Network
GALURA -Umat Islam hirup di alam dunya teh taya lain keur pepelakan alaeun di aherat engke. Lahan keur pepelakanana taya lian profesi nu dijalankeun ku urang. Kitu ceuk KH A. Hasyim Ashari, Ketua DKM Masjid Raya Bandung, waktu tausiah itikaf di Masjid Raya Bandung, Salasa tengah peuting (17/04/2023).
"Manusa mibanda profesi sewang-sewangan. Tah eta profesi teh tempat keur pepelakan urang. Hasil tina pepelakan di dunya bakal diala engke di aherat," ceuk KH A.Hasyim Ashari ka nu keur itikaf di Masjid Raya Bandung.
KH A.Hasyim Ashari meupeujeuhan ka nu keur itikaf di Masjid Raya Bandung sangkan gunakeun profesi urang keur kamasalahatan, keur ngamakmurkeun dunya. Lebah dieu taya hiji oge profesi nu bisa ngajamin pepelakan urang hasilna hade di aherat engke.
Baca Juga: Sastra Sunda Carnyam Putri Anjungsari (89), Tarumpak Maung Lodaya, Muru Padumukan Anyar
"Profesi jadi ustadz, jadi kiayi, jadi ajengan, teu ngajamin hasil pepelakanana hade di aherat engke," ceuk KH A. Hasyim Ashari. Kabeh profesi mibanda potensi hasil pepelakanana alus engke di aherat: padagang, supir, patani, pengacara, jeung profesi sejenna.
Kumaha sangkan pepelakan urang hasilna hade engke di aherat? "Tadi tea gunakeun profesi urang keur kamasalahatan, boh keur diri urangan sorangan, keur keluarga, keur agama, atuh jauhna keur bangsa jeung nagara," ceuk KH A.Hasyim Ashari.
Dina ngajalankeun profesi, nu ku urang diudag karidoan Alloh SWT, keur ngudag barokah. Profesi dipake alat keur ngahontal rido Alloh SWT. Profesi lain tujuan. Profesi dipake keur leuwih ngaronjatkeun kaiaman jeung katakwaan.
"Di Bulan Suci Ramadhan hayu urang nafakuran diri sorangan: naha profesi urang geus dipake pepelakan nu hasilna alaeun engke di aherat atawa acan? Naha pepelakan urang di dunya hasilna mawa kasalametan di aherat atawa sabalikna, " ceuk KH A. Hasyim Ashari.***
