GALURA-Dina taun 2024 ieu, pamaréntah nambahan alokasi gemuk (pupuk) subsidi pikeun para patani, tina 4,7 juta ton jadi 9,5 juta ton atawa naék100 persén.
Éta hal dumasar kaputusan menteri pertanian (Kepmentan) nomer 249 taun 2024, ngeunaan netepkeun alokasi jeung harga écéran pangluhurna pupuk subsidi taun anggaran 2024, anu sawatara waktu kaliwat disaluyuan ku Presidén Joko Widodo.
Dumasar salinan kepmentan kasebut, geus ditetepkeun alokasi pupuk subsidi pikeun di Jawa Barat, réana 1.211.550 ton, Uréa 634.660 ton, NPK 475.555 ton kaasup NPK formula husus jeung organik 101.005 ton.
Patali éta hal, PT Pupuk Kujang minangka anak pausahaan Pupuk Indonesia (Persero), anu nampa pancén di wilayah pamasaran Jawa Barat jeung Banten, tangtuna waé kudu ngaronjatkeun produksi gemuk pikeun nyumponan kabutuh patani.
Diréktur Utama Pupuk Kujang, Maryono, nyebutkeun lamun ngitung kana réana gemuk anu dibutuhkeun pikeun nambahan alokasi gemuk subsidi, saenyana kiwari ogé bisa kacumponan.
Produksi Pupuk Kujang ngahontal 1.140.000 ton uréa sataunna. Ari NPK ngahontal 200.000 ton sataunna.
“Kangggo nyumponan panugasan ti pamaréntah mah tos nyekapan. Namung, produksi ogé teras-terasan dimekarkeun,” ceuk Maryono.
Jenis Pupuk jeung HET
Sajaba nambahan alokasi pupuk subsidi, pamaréntah ogé kiwari nambahan jenis pupuk subsidi tur netepkeun harga écéran tertinggi (HET) pupuk subsidi.
Harga pupuk subsidi dina taun ieu henteu undak. Cindekna angger dumasar harga pupuk dina taun saméméhna.