Network
GALURA.CO.ID -Karrel Frederick Holle teh urang Walanda totok, imigran ti nagri Walanda nu ka Nusantara neangan pakasaban. Ngan basa ditugaskeun di Tatar Sunda merhatikeun pisan kana kahirupan pribumi. Paseh nyarita basa Sunda.
Abad ka-19 dianggap jaman kajayaan Kabupaten Garut. Sanajan harita masih dijajah ku Walanda kahirupan masarakat Kabupaten Garut kawilang subur ma’mur, rahayat teu kungsi ngarandapan kakurangan sandang pangan jeung papan.
Malah hasil tatanen ti Kabupaten Garut jadi andelan keur Kabupaten lianna. Hasil tatanen ti Kabupaten Garut diiangkeun ka wewengkon daerah Priangan sejen, babakuna sayur-syuran jeung bungbuahan, di antarana kesemek jeung jeruk.
Kabupaten Garut harita jadi daerah pangmajuna jeung pangmakmurna sa-Tatar Priangan. Kamajuan Kabupaten Garut harita teu leupas tina jasa dwi tunggal Karrel Frederick (KF) Holle jeun Moehammad Moesa, Hoofd Panghulu Limbangan. Nu hiji urang Walanda nu saurang deui bangsa pribumi, urang Sunda.
Dwi tunggal K. F Holle jeung Moehammad Moesa disebut-sebut nu naratas modernisasi urang Sunda. Dwi tunggal K. F Holle jeung Moehammad Moesa jadi cikal bakal kamajuan masarakat Kabupaten Garut dina widang tatanen, ingon-ingon, jeung atikan nu saterusna matak mawa karaharjaan kaum pribumi.
KF Holle lian ti ngokolakeun pakebonan Waspada di Cikajang, oge mere conto anu hade keur kamajuan masarakat boh dina widang tatanen, ingon-ingon, jeung atikan. K F Holle remen turun langsung ngaping masarakat dina tatanen, miara ingon-ingon, miara lauk sangkan hasilna nyugemakeun.
Holle oge ngahaja ngadatangkeun bibit-bibit unggul pikeun mekarkeun tatanen. Apan mangsa harita sohor kacang Holle, domba Garut jeung tatanen sistim sengked. Holle ngawanohkeun tatanen sistem sengked atawa terasering teh lantaran wewengkon Garut diwengku gunung jeung pasir.
Holle oge muka sakola Eropa (bizondere europeesche school) jeung sakola pendidikan guru keur bangsa pribumi. Holle nerbitkeun majalah jeung brosur Mitra noe Tani. Ngaliwatan majalah jeung brosur, Holle mere conto cara tatanen anu hade sangkan hasilna mucekil. Mitra noe Tani oge ngamuat puisi jeung dongeng atawa carita babad keur ngaronjatkeun minat maca masarakat.
Widang pariwisata oge ngaronjat. Di Kabupaten Garut harita ngadeg sababaraha hotel, restoran jeung tourist bureau tempat informasi anu tujuanna mere nyaho sangkan turis anu datang ka Garut apal tempat- tempat anu merenah pikeun rekreasi. Malah Garut harita sohor jadi Swiss Van Java.
