Network
GALURA-Kepala Dinas Ketahanan Pangan dan Pertanian (Diskatan) Kabupaten Kuningan, Wahyu Hidayah, nyebutkeun dina taun 2024 ieu, Kabupatén Kuningan meunang bantuan mangrupa mesin kompa cai ti kementerian pertanian.
Éta mesin kompa cai téh diancokeun pikeun nyumponan kabutuh patani di 76 désa, 22 kecamatan, jumlahna 123 unit pikeun 123 kelompok tani.
Ceuk Wahyu, dina ngadistribusikeun bantuan mesin kompa cai ti pamaréntah, anu diutamakeun téh pikeun nyaian lahan sawah tadah hujan anu deukeut reujeung sumber cai.
Dumasar data statistik pertanian, ceuk Wahyu, di Kabupaten Kuningan téh aya 3.816 héktar lahan sawah tadah hujan anu deukeut sumber cai.
Ti antarana waé di pawétanan wewengkon Kabupatén Kuningan, kawas Kecamatan Cidahu, Cimahi, Cibeureum jeung Cibingbin.
Kasebut sawah tadah hujan, dina mangsa usum halodo tangtu sok kagaringan. Dalah sawah nu ngandelkeun cai irigasi oge sarua sok kakurangan cai.
"Ku ayana ieu bantuan, dipiharep ada tiasa ngabantu patani anu ngagarap lahan sawah tadah hujan anu caket ka sumber cai," ceuk Wahyu.
Sajeroning kitu, Penjabat Bupati Kuningan, Iip Hidajat, miharep éta mesin kompa cai bantuan ti Pemerintah daérah téh dimangfaatkeun hadé ku parapatani.*
