Jejer KKN PPM Unigal, Bupati Ciamis: Sajalan jeung Visi Kabupaten Ciamis

GALURA – Bupati Ciamis, Herdiat Sunarya nyebutkeun jejer (tema) KKN Unigal (Universitas Galuh) Ciamis sajalan jeung program pamarentah Kabupaten Ciamis nu kaunggel dina visi Kabupaten Ciamis.

Bupati Ciamis nepikeun hal eta waktu miangkeun jeung ngajurung laku 498 mahasiswa Unigal nu Kuliah Kerja Nyata Pembelajaran dan Pemberdayaan Masyarakat (KKN PPM), di pakarangan Pendopo Setda Kabupaten Ciamis, Selasa (31/01/23).

Jejer KKN Unigal taun ayeuna: Peningkatan Ekonomi yang Berkelanjutan melalui Program KKN PPM Universitas Galuh Tahun 2023. Visi Kabupaten Ciamis: Mantapnya Kemandirian Ekonomi Sejahtera untuk Semua.

Baca Juga: Milad ka-88 Ponpes Al-Quran Cijantung, Bupati Ciamis: Ponpes Al Quran Cijantung Kontribusina Luar Biasa

“Jejer KKN Unigal oge luyu sareng misi ka-3 Kabupaten Ciamis: Mengembangkan Perekonomian Yang Berbasis Ekonomi Kerakyatan, Potensi Unggulan Lokal dan Pemberdayaan Masyarakat,” ceuk Bupati Ciamis.

Bupati Ciamis nyebutkeun dina ngapulihkeun paekonomian masarakat sanggeus kapeupeuh ku sasalad Covid-19, henteu ngan ukur bisa dipilampah ku pamarentah.

“Ngapulihkeun deui ekonomi sabada sasalad Covid-19, perlu rojongan ti sakumna kalangan, kaasup ti akademisi,” ceuk Bupati Ciamis.

Tina kituna Bupati Ciamis ngabageakeun pisan KKN PPM Unigal lantaran bisa nunjel jeung nyukseskeun visi misi katut program pamarentah Kabupaten Ciamis.***