Network
Ku: Sandi Syahtiman
Assalamu’alaikum wr wb
Bismillahirrohmanirrohim
Pun Sapun – Ampun Paralun
Sampurasun – sampurna ingsun
Di jaman kiwari manusa kudu bisa ngamangpaatkeun karya-karya hade bihari titinggal karuhun tibatan maluruh sajarah lan silsilah matak beak waktu jeung kurang mangpaatna. Lain rek mohokeun tapi ku ngajalankeun karyana oge leuwih ti nginget-nginget.
Siga HP pek pake jeung gunakeun anu mangpaat teu kudu maluruh sajarah kumaha dijieunna atawa maluruh silsilah anu nyieunna komo saha karuhunna. Pastina moal mangpaat.
Teu beda siga Al-Qur’an anu geus sampurna, tinggal laksanakeun tuntunan supaya salamet hirup nepi ka maot. Lamun maluruh sajarah silsilah omat bisi salah sumber, hasilna lain meunang elmu tapi malah ngagogoreng Rasulullah SAW. Komo sumberna anu ti beda agama mah.
Tapi lamun ngalaksanakeun tuntunan Al-Qur’an mah tinggal laksanakeun Rukun Islam, jalankeun hirup ku hate beresih, jujur jeung mampu ngadalian emosi. Dijamin istiqomah di ahir renghap, teu rieut mikirian sajarah lan silsilah.
Teu beda siga karuhun cape maluruh sajarah lan silsilah, lamun dipariksa tiap desa dijamin carita sajarah silsilah Karajaan Padjadjaran jeung Eyang Prabu Siliwangi pasti beda-beda, geus cape nanya nu hirup jeung ghaib malah jadi bingung.
Mendingan Ngaji-Kaji-Nguji, Pok-Pek-Prak tuntunan anu geus jelas SILIH ASIH, SILIH ASAH, SILIH ASUH geus pasti SILIH WANGIKEUN.
Lamun dipikaran oge sigana kajeun boga karuhun Raja Sakti Digjaya Mandraguna terus kolot urang presiden, lamun urang maot malaikat mah moal bisa disogok jeung oge moal pancakaki..
Kahayang karuhun oge ibarat urang sorangan anu geus boga budak, urang teu butuh dipupuji komo disembah ku budak urang. Urang bakal bungah tur reueus lamun budak ngalaksanakeun parentah urang anu umumna kudu jadi budak soleh, hade ahlak, jalankeun tuntunan Al-Qur’an, jaga tur olah lembur alam ku tuntunan karuhun budaya bihari.
Ahirul kalam ieu tulisan lain rek mohokeun sajarah atawa silsilah tapi ngajalankeun tuntunan atawa parentahna Rasulullah SAW jeung karuhun otomatis ngajaga kanyaah aranjeunna.
