Network
GALURA.CO.ID -Kepala Kemenag Kabupaten Bandung Barat (KBB), Drs. H. Tedi Ahmad Junaedi, M.Si., waktu jadi Panyatur dina Bimbingan Manasik Haji (Bimsik) di lingkungan KUA Cisarua nu diluuhan ku 57 urang calon Haji asal Kec Cisarua, nyebutkeun, jumlah sagemblengna calon jamaah haji asal Kabupaten bandung Barat nu baris miang ka Tanah Suci keur taun 2024/1445 H., ngahontal 1.181 urang.
“Atuh, jamaah nu asup waiting list atawa daftar tunggu, waktu nungguna antara 10 tepi ka 20 taun,” pokna. Calon jamaah haji kudu sabar ngadagoan waktuna miang ka Tanah Suci.
Patali Hak jeung Kawajiban Jamaah calon Haji, Tedi nu kungsi cepeng kalungguhan Kepala Kemenag Kota Bandung, nembrakeun informasi penting patali tanggung jawab pamarentah dina ngalola jeung ngordinir kagiatan ibadah haji keur warga nagarana.
Baca Juga: Wakil Bupati Bandung Sahrul Gunawan Apresiasi Kemenag nu Ngagaungkeun Kerukunan Umat Beragama
Dina prakna Ibadah Haji, pamarentah, mibanda tilu pancen, ngabina jamaah calon haji, nyumponan atawa layanan jeung mageran atawa nangtayungan jamaah calon haji.
“Bimbingan manasik haji, udaganna keur nyiptakeun calon jamaah haji nu mandiri, neueul kana aturan ibadahna jeung lalampahanna salila di Tanah Suci. Diharepkeun, jamaah faseh kana regulasi jeung aturan atawa undang-undang nu geus ditangtukeun,” pokna.
Tedi, netelakeun, sakumna jamaah calon haji, faseh kana aturan nu anyar patalina jeung kawijakan ti pamarentah taun 2024 M/1445 M, ngeunaan Istitha’ah Kasehatan jadi syarat calon Jamaah haji keur munahan atawa ngalunasan Biaya Perjalanan Ibadah Haji (Bipih).
Jamaah calon haji KBB, luyu jeung Undang-undang Nomer 8 taun 2019, ngeunaan, Penyelenggaraan Haji & Umroh, Pasal 6, di antarana disebutkeun, wajib narima bukti setoran ti BPS BIPIH katut Nomer Porsi ti Menteri Agama. Salian ti eta, narima Bimbingan Manasik Haji, layanan transportasi, layanan akomodasi, konsumsi, jeung kasehatan.
Anu sejenna calon jamaah haji narima identitas haji jeung dokumen sejenna salila ngalaksanakeun ibadah haji.
