Network
Baca Juga: MA Darul Ma'arif Kabupaten Bandung Adu Manis Atikan Sain Teknologi jeung Kaislaman
Éra industri 5.0, éra digitalisasi, ngamangpaatkeun kacanggihan téknologi informasi. Fasilitas digital dimangpaatkeun jadi sumber lahan diajar, sarana diajar, ngaakses informasi keur para guru dina upaya ngaronjatkeun pembelajaran.
Nilik ka dinya, Ali nu lulusan S1 Prodi Matematika Fakultas Keguruan dan Ilmu Pendidikan – Universitas Pasundan (FKIP Unpas) jeung S2 Magister Unpas téh, boga udagan, ngawujudkeun siswa nu binekas, mandiri jeung inovatif.
“Nu kadua, mairan tantangan kamajuan téknologi informasi, cohagna siswa sim kuring kudu parigel, ulah gapték, ulah tinggaleun,” pokna.
Ali, teureuh Garut, gumelar di Cibatu, 10 Désémber 1974, kulawarga Bapa H. Kodir suargi jeung biangna, Hj. Juariah. Mangsa dumuk di lemburna, Kampung Singkup, Ali nu lulusan SDN Singkup, SMP Negeri Kurnia, jeung SMA Negeri Malangbong téh, diatik hirup peurih ku nu jadi kolotna.
Réngsé sakola, Ali purah ngangon domba jeung munding nu kolotna jeung nu tatanggana. “Nuju halodo atawa usum hujan, saban dinten kedah ngarit, milari jujukutan keur parab ingon-ingon,” pokna.
Baca Juga: Munaqosah Tahfidz 2024 di SMAN 2 Lembang,
Pasosoré, neuleuman pangajaran agama (Islam) di madrasah jeung masjid. Ali gé kaasup budak gaul, saperti biasa sok maén bal, resep ulin aber-aberan jeung papada baturna. Ngan, almarhum bapana teu weléh nalingakeun, pangpangna kana ahlak jeung atikan.
“Pun bapa mah disiplin, ngadidik para putrana keras pisan. Hirup kudu junun, kitu amanatna. Nya alhamdulillah, didikanna karaos dugi ka ayeuna mangpaatna,” cenah.
Ngadahup ka guru SDN Kota Baru, Euis Lengkanawati, S.Pd.I, kasinugrahan tilu budak, dina matéakeun sakola nu dipupuhuanna teu weléh ngaubkeun 33 urang guru jeung karyawan.
