GAlURA.CO.ID -Munaqosah teh keur ngukur tepi ka mana proses pembelajaran, di antarana neuleuman jeung ngapalkeun Al-Qur'an. Kitu ceuk Kepala Dinas Pendidikan (Kadisdik) Jawa Barat, Wahyu Mijaya dina kagiatan Seleksi Beasiswa Umrah "Munaqosah Tahfidz 2024" di SMAN 2 Lembang, Kabupaten Bandung Barat, Senen (29/01/2024).
Kadisdik oge ngawilujengkeun ka siswa jeung tenaga kependidikan nu lulus seleksi beasiswa umrah. "Mudah-mudahan jadi barokah kanggo Ibu Bapa Guru sareng siswa nu kenging beasiswa umroh," pokna. Kadisdik omat-omatan anu penting mah lain meunang umrohna, tapi kumaha urang ngaimplementasikeun ajaran Islam dina kahirupan sapopoe.
Kadisdik nitipkeun sababaraha hal. Kahiji, kaimanan kudu diasah; kadua, olahraga sangkan tetep seger; katilu, kailmuan atawa kaahlian kudu tetep diasah; kaopat, bangun emosi karakter ku cara hade. "Urang teu bisa ukur ngabangun tina sisi kailmuan jeung kaahlian, tapi oge kudu ngabangun karakter nu hade-hadena," pokna.
Baca Juga: SMA Pasundan 7 Kota Bandung jeung SMA Pasundan 3 Kota Cimahi Nyiptakeun Sakola Unggulan jeung Atlit
Kepala SMAN 2 Lembang, Ernawati ngajentrekeun program Munaqosah Tahfidz Al-Qur'an teh keur ngarpojong pentingna ngajaga Al-Qur'an. "Ieu program hasil tina infak sapoe Rp1.000 warga sakola," pokna. Program beasiswa umrah munaqosah tahfidz di SMA Negeri 2 Lembang, dilaksanakeun ti 2018.
"Taun 2024 ayeuna jejerna: Membentuk Insan Berakhlak Qur'ani, Membumikan Al-Qur'an, dan Melangitkan Harapan. Jumlah nu daftar di taun 2024 aya 17 siswa jeung 5 urang guru katut tenaga kependidikan," pokna. Tahapan jeung proses seleksi: tahap 1 ngawengku verifikasi jeung validasi pendaftaran.
Salian ti eta oge mariksa lengkepna berkas atawa dokumen sarta rekomendasi tina sikap, kabiasaan, jeung basa nu dipake sapopoena. Tahap ka-2, seleksi bacaan jeung hafalan Al-Quran. “Anu lolos seleksi bakal diumrohkeun tina beasiswa umrah munaqoash tahfidz, milu ka biro perjalanan ibadah haji jeung umroh,” ceuk Ernawati. ***