Network
GALURA - David da Silva, striker Persib Bandung geus siap makalangan deui nyanghareupan Borneo FC dina minggu ka-20 Liga 1, Kemis 26 Januari 2023.
"Kuring tos latihan deui. Ayeuna kuring siap saratus persen makalangan mayunan Borneo FC," cek David da Silva.
Saméméhna, basa keur latihan di Stadion Siliwangi sawatara waktu ka tukang, David da Silva ngangluh sabab dina pingpingna karasa aya nu nyeletit nyeri.
Baca Juga: 840 PPS Dilantik jeung Disumpah, Ketua KPU Kabupten Bandung: Siap Ngalaksanakeun Pemilu
Baca Juga: Jadi Ketua Umum KONI Kabupaten Bandung, Yana Suryana Nargétkeun Asup 3 Besar di Porprov Jabar 2026
Alatan éta hal, manéhna meunang perawatan jeung panalingaan dokter heula, supaya rasa nyeri dina pingpingna cageur.
Hadéna, teu butuh waktu lalu, kaayaan David da Silva cageur cara bihari deui.
Buktina, basa Persib latihan di Stadion Siliwangi, Kota Bandung, Salasa 24 Januari 2023 kamari, David da Silva alias DDS geus tembong latihan deui.
Baca Juga: Putri Anjungsari (7)
Panyerang atawa striker asal Brasil téh, samalah tembong miluan sakabéh sési latihan, taya nu kaliwat, sajaba ti tembong sumanget téh.
"Pokona kuring saparakanca tos siap makalangan," cek éta panyerang nu meunang landihan DDS teh.
Sajaba ti siap makalangan, David da Silva ogé ngaku siap ngumpulkeun angka keur Persib, malar Maung Bandung aya di jalur juara.
Baca Juga: Travo Gardu Listrik di Citangtu Kabentar Gelap, Aliran Listrik di Sababaraha Desa Pareum
Sakumaha anu pada terang, nepi ka minggu ka 19, Pangéran Biru geus ngalakonan 11 pertandingan bari teu ngalaman éléh.
Lantaran éta, Persib ayeuna aya di tilu besar pucuk klasemen sementara Liga 1.
Nérékélna Persib ka "papan atas" klasemen Liga 1 téh, antarana alatan jasana David da Silva.
Baca Juga: Rakor Kemendagri jeung Daerah, Sekda Ciamis Tatang: Inflasi Kudu Bisa Diungkulan
Der Jang, ah, gaskeun!***
