GALURA.CO.ID -Dina sela-sela seren sumeren jabatan Kepala SMA Pasundan 3 Kota Cimahi, ti Drs. Sukandar ka Iwan Suwanda, S.Pd., MM nu samemehna Wakasek Kesiswaan SMA Pasundan 8 Kota Bandung. Wakasek Kurikulum SMA Pasundan 3 Kota Cimahi, Yayat Hendayana, S.Pd., Salasa (16/01/2024) netelakeun ka Galura, nyalusur sajarahna, ieu sakola teh asal muasalna mah Sakola Guru Olahraga (SGO).
Teu ngabibisani, ngeunteung kana eta sajarah, SMA Pasundan 3 Kota Cimahi tepika kiwari, dina proses kagiatan diajarna leuwih neueul kana kamekaran olahraga. “Alhamdulillah, dugika danget ayeuna, seueur pisan siswa nu ngagaduhan prestasi olahraga sareng ngaleler juara, boh di tingkat kota/kabupaten, provinsi dugika tingkat nasional,” cek Yayat.
Dina saban musim PPDB, SMA Pasundan 3 Kota Cimahi, teu weleh nyadiakeun jalur husus keur murid anyar nu hayang jadi siswa, saratna teh, cek Yayat, siswana kudu mibanda prestasi olahraga. “Siswa nu gaduh prestasi olahraga, dibebaskeun tina biaya SPP sareng Dana Sumbangan Pendidikan,” pokna deui.
Baca Juga: MA Darul Ma'arif Kabupaten Bandung Adu Manis Atikan Sain Teknologi jeung Kaislaman
Nurutkeun Yayat, sawatara jenis olahraga nu dipupujuhkeun di SMA Pasundan 3 Kota Cimahi, diantarana, Futsal, Volly Ball, Badminton, Bola basket, maenbola, Taekwondo, Karate jeung Silat, katut sawatara cabang olahraga sejenna.
“Saban dinten, bakat sareng potensi para murid dina dunya olahraga, dibina, diasah, kaleresan di ieu sakola aya kurikulum husus widang olahraga,” pokna. Jumlah guru, aya 48 urang, nurutkeun Yayat, kasangtukang meh kabeh manten atlit nu kungsi ngogan prestasi unggulan dina sawatara turnament olahraga.
Ngajawab patalekan Galura, Iwan Suwanda, negeskeun, dirina baris neruskeun hanca gawe pupuhu nu geus maren, ngaronjatkeun mutu pendidikan nu luyu jeung udagan visi misi Paguyuban Pasundan.
“Sakumna siswa di SMA Pasundan 3 Kota Cimahi, kudu mibanda ahlak nu mulya, mibanda pribadi nu religi, tukuh ngalaksanakeun parentah agama Islam jeung mikacinta kana ajen inajen seni tradisi budaya Sunda, babarengan rumawat kana lestarina budaya Sunda,” pokna.