Network
Inilah Kisah dari Jalanan,
Tentang Seorang Pemuda Terpandang,
Cinta tak direstui, dia tetapkan hati,
pergi merantau unjukkan diri,
Pergi ke Kota menjadi mafia,
Dengan ilmu yang dimilikinya,
Perintah tembak mati tak lama menghampiri,
untuk sang buron paling dicari,
padahal dia sedang bercinta,
dengan kekasih masa kecilnya,
padahal dia sedang bercinta dengan gadis dari kampung halamannya
(Syair Lagu Mat Peci, Group Band Bandi Harmony)
GALURA -Keur budakna, Mat Peci, idek liher di madrasah jeung masjid. Tuluy asup ka sawatara pasantren, ngasakkeun elmuning agama Islam. Hirupna taya cawaden, taya carekeun, estuning budak nu nurut kana papagah kolot.
Manjing dewasa jadi buronan polisi, Mat Peci diuber ka mana lumpatna tepi ka nemahan pati 4 Februari 1978, di lemburna sorangan, di hareupeun Stasiun Leuwigoong Kabupaten Garut.
Umumna nu tigebrus kana prilaku nu jahat teh, lantaran kahirupan ekonomina nu masakat atawa kurang raharja. Tapi, ari Mat Peci bin Sutomo mah henteu kitu.
Baca Juga: Mat Peci, Antara Garut jeung Bandung, Ngageunjleungkeun Nagara
Baca Juga: Galura Cetak IV Juli 2023, Kampung Iklim Ciparay Kabupaten Ciamis, Nohagaan Iklim Lokal
Mat Peci gumelar ti lingkungan kulawarga nu sagala aya, ti bubudak diatik jeung dididik dina bag-bagan agama Islam, geus manjing umur rumaja tuluy masantren neuleuman bag-bagan agama Islam.
“Asa pamohalan teuing ari hirupna kudu pacengkadan jeung urusan hukum mah. Putra ti lingkungan kulawarga nu dipikaserab, anak nunggal, hayang naon teu weleh dicumponan,” ceuk Abah Karna, 79 taun, nu ngaku mangsa keur leutikna Mat Peci sok diasuh ku dirina.
Abah Karna, meh sapuluh taun digawe jadi pakacar di kulawarga Sutomo, nu lubak-libuk harta bandana, lega sawah jeung kebonna. Abah Karna, keur umur dua puluh taun, sagawe-gawe.
