Network
GALURA -Bupati Cianjur, Herman Suherman, teu ngaluuhan diresmikeunana bale pelatihan di Desa Benjot, Kecamatan Cugenang. Bale pelatihan diresmikeun ku ketua umum PB Paguyuban Pasundan, H.Didi Turmudzi, Kemis (20/07/203).
Padahal Bupati Cianjur dianti-anti pisan ku korban lini di Desa Benjot. Sakuamaha nu ditepikeun ku Inggrid, warga korban lini, utamana nu can meunang bantuan keur ngabangun imah hayang panggih jeung Bupati Cianjur.
Warga korban lini hayangeun nanyakeun soal bantuan. Cenah mah Bupati Cianjur teu ngaluuhan diresmikeunana bale pelatihan Paguyuban Pasundan lantaran sieuneun didemo ku warga.
Baca Juga: Warga Korban Lini di Kabupaten Cianjur Miharep Bantuan Modal ti Paguyuban Pasundan
Tadina, warga Kemis harita rek ka Pendopo Kabupaten Cianjur, ngan dicaram lantaran aya upacara mieling milangkala Paguyuban Pasundan. Tadina warga miharep Bupati Cianjur ngaluuhan diresmikeunana bale pelatihan.
Maman, ti Komda Paguyuban Pasundan Cianjur, ngaenyakeun, tadina rek aya demo mun Bupati Cianjur ngaluuhan diresmikeunana bale pelatihan.
Ceuk salasaurang nu deuheus jeung Bupati Cianjur, Bupati Cianjur teu nyaksian diresmikeunana bale pelatihan lantaran Bupati Cianjur loba acara sejenna nu leuwih penting.*** Cecep KS
