Network
GALURA -Masarakat Desa Benjot, Kecamatan Cugenang, Kabupaten Cianjur nu keuna musibah lini 21 Nevembor 2022 nyebutkeun keur biaya hirup sapopoe masih nganjuk ngahutang. Duka iraha bisa mayarna lantaran tacan boga usaha nu maneuh.
Aya warga Desa Benjot nu ngaku bantuan rehab imah dina tahap kahiji, can meunang tahap kadua atawa tahap katilu. Tina kituna pikeun ngarengsekeun imahna unjam-injem ka dulurna atawa ka nu mampu lantaran tacan boga pangasilan.
Di Desa Benjot, daerah nu nu ruksakna pangparnana mah di Kampung Padaruum. "Hanjakal, warga di dinya can meunang bantuan sosial ti Paguyuban Pasundan," ceuk Inggrid.
Baca Juga: Korban Lini di Desa Benjot, Kecamatan Cugenang, Kabupaten Cianjur, Loba nu Tacan Meunang Bantuan
Paguyuban Pasundan oge eunggeuh kana kaayaan warga nu loba tacan boga pacabakan. Saminggu samemeh puncak acara mieling milangkala Paguyuban Pasundan, dosen jeung para mahasiswa ti Fakultas Teknik Universitas Pasundan, ngagelar pelatihan nyieun sabun tina bahan minyak jalantah, pelatihan pertanian katut pelatihan sejenna.
Pelatihan, karasa pisan mangpaatna ku sakumna warga. Ngan, ceuk Inggrid, ka hareupna, pihakna meredih ka Paguyuban Pasundan, sangkan aya bantuan modal jeung bantuan alat-alat tatanen.
"Bantuan modal jeung bantuan alat-alat tatanen, langsung dibagikeun ka patani, tong dibagikeun ngaliwatan desa, atawa ngaliwatan perwakilan ti mana wae, supados transparan, " ceuk Inggrid.
Warga Desa Benjot, salian ti miharep bantuan modal ti Paguyuban Pasundan, oge miharep, sakumaha nu ditepikeun ku Inggrid, sangkan tanah milik warga Arab nu dipake ku wangunan bale pelatihan dibeli ku Paguyuban Pasundan.
