Network
GALURA -Alatan lini magnitudo 5,6 tanggal 21 November 2022, paimahan di Desa Benjot, Kecamatan Cugenang Kabupaten Cianjur ancur burakrakan. Masarakat Desa Benjot, jadi katalangsara, teu boga imah.
Saheulaanan, warga Desa Benjot caricing dina tenda-tenda darurat atawa di rohangat masjid jeung madrasah nu bisa dipake saheulaanan. Aya oge sawatara warga nu diungsikeun ka tempat nu anggang masih di Kecamatan Cugenang Kabupaten Cianjur, sawarehna milu nyiruruk di imah dulur-dulurna.
Basa nataran wilayah Desa Benjot, Kecamatan Cugenang Kabupaten Cianjur, warga nu ngarungsi geus marulang deui ka lemburna. Paimahanna, geus ngaradeg deui ku ayana bantuan ti pamarentah jeung para donatur. Memang, paimahan nu kawilang sederhana.
"Hayang ngawangun deui imah nu permanen mah, warga merlukeun dana nu sumberna tina saku sorangan, ngan ti mana atuh sawatara warga hirupna tina jadi buruh tani di dieu mah," ceuk Inge Inggrid, warga Kampung Pangkalan Desa Benjot.
Ngawangkong di imahna, Inggrid netelakeun, bantuan keur warga nu imahna ancur ku gempa, dibagi tilu termin. Aya sajumlah warga nu geus narima bantuan rehab, nu saban imah gedena bantuan teh Rp60 juta.
Tapi, ceuk Inggrid, aya sawatara warga nu geus sataun lilana ti barang kajadian musibah lini, can narima sapeser goeng acan keur ngarehab atawa ngawangun imahna deui. Keur saheulaanan maranehna masih cicing di tenda.
Salasaurang nu can narima bantuan teh, ngaranna Abah Udin, kasebutkeun sesepuh di Kampung Pangkalan. "Sumuhun, Abah teu acan nampi bantuan sapeser oge," ceuk Udin ka Galura.
