Network
GALURA- Kepala SDN Sampora, Kecamatan Margahayu Kabupaten Bandung, Lilis Holisoh can panceg 2 taun mancèn di sakola nu lebahna nyingkur di RT 5 RW 17 Desa Sukamenak. Inyana satèkah polah mertahankeun prestasi nu geus kahontal jeung ngajalankeun Kurikulum Merdeka (Kurmer).
Basa tepung di kantorna, di SDN Sampora Kabupaten Bandung, Salasa (15/8/2023) Lilis boga pamanggih, kauntungan tina Kurikulum Merdeka teh pembelajaranana differensiasi: pembelajaran nu diluyukeun jeung kabutuhan siswa nu sacara kodrati teu sarua, boh dina kamampuan, minat, boh profil diajarna.
Ceuk Lilis, ku Kurikulum Merdeka, sakola jeung guru dibèrè kalaluasaan pikeun nangtukeun kurikulum jeung metode pembelajaran nu luyu jeung kabutuhan siswa, saperti nu dilakukeun ku sakola di Kabupaten Banung, kaasup di SDN Sampora.
Baca Juga: Pocil SDN Majalengka Wetan IV Nyangking Dua Gelar Juara dina Lomba Pocil di Polda Jabar
Ku kituna, bisa diajar luyu jeung kamampuan tur minatna, tepi ka siswa bisa leuwih paham, ogè deuih bisa ngaronjatkeun motivasi jeung partisipasi siswa dina proses pembelajaran.
Ku panguatan projek profil pelajar Pancasila, dipiharep ku Lilis bisa ngamekarkeun karakter-karakter positif nu diwangun babarengan guyub dina kelompok belajar.
Ngan, cenah ceuk Lilis, wegahna tèh guru diperedih kudu moktèkar pikeun ngembangkeun pembelajaran nu ngagunakeun strategi nu variasi nu bisa ngaakomodasi sagala kabutuhan diajar saban siswa.
"Ku ayana diferensiasi dina proses sareng produk, mangka teu aya deui standarisasi dina pameunteunan. Ieu tèh ngajantenkeun teu pastina perkawis hasil ahir sareng ngajantenkeun sesah kanggo pamarèntah meunteun efektivitas program, " ceuk Lilis.*** Sopandi
