Network
GALURA –Bupati Majalengka, Karna Sobahi, nu dina Pilkada 2024 bakal nyalon deui nyebutkeun salila kurang leuwih 10 taun ka tukang, kaasup dina kapamingpinana, Pemda Kabupaten Majalengka teu nganggarkeun dana hibah daerah.
"Salami kirang langkung 10 taun kapengker dana hibah daerah (di Kabupaten Majalengka) teu aya, dina taun 2023 dianggarkeun Rp9,2 milyar, dina taun 2024 tos dianggarkeun Rp12,4 milyar,” ceuk Bupati Majalengka.
Dana hibah daerah sumberna tina APBD Kabupaten Majalengka. Ceuk Bupati Majalengka, taun ayeuna dana hibah daerah keur lembaga keagamaan jeung pasantren jumlah sagemblengna Rp4,375 milyar.
Baca Juga: Silaturahmi Kapolda Jabar di Polres Majalengka, Masrahkeun Kadeudeuh ka Penyandang Disabilitas
Nota Perjanjian antara Pemda Majalengka jeung pasantren katut lembaga keagaman ngeunaan dana hibah daerah ditandatangan di Gedong Yudha, Senen (17/07/2023).
Bupati Majalengka, ngawilujengkeun ka sakumna nu nampa bantuan dana hibah daerah. “Pamugi ku ayana bantosan dana hibah daerah ti Pemda Majalengka kangge 35 lembaga keagamaan tiasa ngabantos tur ngalancarkeun kagiatan, boh kanggo operasional boh kanggo nu sanesna," pokna.
Dina laporanna, Kepala Bagian Kesejahteraan Rakyat Asisten Pemerintah dan Kesejahteraan Rakyat Sekretariat Daerah Kabupaten Majalengka, H. Asep Zaki Mulyanto, nyebutkeun nu bakal nampa dana hibah daerah taun 2023 teh tadina 42 lembaga.
“Aya tujuh lembaga nu taun anggaran 2023 teu jadi meunang dana hibah daerah, ngan bakal ditimbang-timbang deui dina taun anggaran 2024,” ceuk Asep Zaki. Tina kituna anu dina taun anggaran 2023 meunang dana hibah daerah jumlahna 35 lembaga.
Baca Juga: Narkoba Tacan bisa Diungkulan wae, Polres Majalengka Ngungkab deui 9 Kasus Narkoba
