Network
GALURA -Komunitas Gada Membaca, di Desa Winduraja, Kecamatan Kawali, Kabupaten, Ciamis, Jawa Barat, Senen, 6 Februari 2023, nga-launching Pojok Baca Digital dibarengkeun jeung Festival Budaya Bumbung, sarta Pameran & Lomba Makanan Khas Sunda.
Ketua Komunitas Gada Membaca, Agus Munawar, nyebutkeun Komunitas Gada Membaca muka fasilitas Pojok Baca Digital teh taya lian ti keur ngaronjatkeun pangladen ka masarakat.
“Kasang tukang Komunitas Gada Membaca nyayagikeun Pojok Baca Digital supados masarakat gampil dina milarian informasi tina buku digital, sareng sumber-sumber sanesna dina internet,” ceuk Agus.
Baca Juga: Putri Anjungsari (10)
Agus netelakeun fasilitas Pojok Baca Digital di Komunitas Gada Membaca bantuan ti Perpustakaan Nasional Republik Indonesia sarta dideudeul ku Dinas Perpustakaan dan Kearsipan Kabupaten Ciamis.
“Pojok Baca Digital tos tiasa digunakeun ku masyarakat, tiasa maca buku dina aplikasi iPusnas,” ceuk Agus
Make aplikasi iPusnas masarakat bisa maca rupa-rupa buku digital nu henteu mangrupa buku nu dicitak.
Kajaba bisa maca buku dina aplikasi iPusnas, komputer jeung akses internetna bisa dipake keur diajar jeung hiburan.
Agus nyebutkeun rojongan jeung komitmen ti pihak-pihak nu aya patalina jeung tarekah ngaronjatkeun kualitas SDM diperlukeun pisan sangkan Komunitas Gada Membaca bisa terus cumarita dina ngawangun masarakat.
“Komunitas Gada Membaca unggal aya kasempatan salawasna kolaborasi jeung sinergi kanggo kamajuan masarakat,” pokna.
Buku koleksi Komunitas Gada Membaca di antarana bantuan ti CSR Gramedia Whole Shale Bandung, ketua Ikatan Penerbit Indonesia (IKAPI) DKI Jakarta.
Salian ti oge aya oge nu sacara pribadi nyumbang buku keur Komunitas Gada Membaca. Tina kituna jumlah buku jeung fasilitas di perpustakaan Komunitas Gada Membaca terus nambahan.
Baca Juga: DPRD jeung Dinkes Kabupaten Ciamis Meredih Pihak Sakola Nalingakeun Jajanan Barudak
Launching Pojok Baca Digital, Senen, 6 Februari 2023, nu tempatna di Komunitas Gada Membaca rencanana diluuhan ku Bupati Ciamis, Bunda Literasi Kabupaten Ciamis, pajabat ti Perpusnas jeung Bapenas RI.
Agus nyebutkeun Launching Pojok Baca Digital jeung Festival Budaya Bumbung nu dipokalan ku Pemerintah Kecamatan Kawali jeung Komunitas Gada Membaca ngaubkeun Dinas Perpustakaan dan Kearsipan Kabupaten Ciamis jeung pihak sejenna.***
