Network
GALURA.CO.ID- Rèngrengan Pamarèntah Kabupaten (Pemkab) Bandung miluan rapat koordinasi (rakor) teknis World Water Forum (WWF) ka-10 nu baris dilaksanakeun di Bali taun 2024 ayeuna.
Rakor nu diayakeun Kementerian Dalam Negeri RI tur ngaubkeun pamarèntah daerah jeung pausahaan dilaksanakeun daring.
Ngawakilan Bupati Bandung Dadang Supriatna, Asisten Perekonomian dan Pembangunan Kabupaten Bandung Marlan milu kana rakor. Ceuk Marpan WWF tèh salasahuji bagèan ti mièling Hari Air Sedunia.
WWF dieusi seminar, pameran teknologi ngokolakeun cai. "Kumargi kitu pausahaan daerah dina widang cai diulem hadir dina WWF ka-10," ceuk Marlan basa rakor daring di Gedung Setda Komplek Pemkab Bandung, Soreang, Juma'ah, 3 Mei 2024.
Marlan nyebutkeun, ngokolakeun cai bersih memang bangga, tapi teknologi terus mekar. Jadi, cenah kumaha sangkan pamarèntah daerah atawa Badan Usaha Milik Daerah (BUMD) bisa ngamangpaatkeun teknologi ngokolakeun cai nu leuwih efektif jeung efisien.
Ceuk Marlan, nu diondang lain ukur pamarèntah daerah atawa BUMD nu aya di Indonesia, hususna di Kabupaten Bandung, ogè ti luar negeri.
Danget ieu ceuk Marlan, layanan cai bersih di Kabupaten Bandung geus nepi kana 87 persen, boh layanan cai beresih nu dilkokolakeun PDAM Tirta Raharja, SPAM (Sistem Penyediaan Air Minum) nu dikokolakeun ku pamarèntah desa boh ku komunitas.
"Nya ieu perluna aub dina kagiatan WWF, kanggo tukeur luang boh kanggo nitènan dugi ka mana daerah sèjèn atawa teknologi nu geus aya engkèna bisa dimanfaatkeun ku urang ," ceuk Marlan.
Pamarèntah daerah, ceuk Marlan keur nyurung pihak PDAM hususna, pikeun ngaronjatkeun layanan cai beresih ka masarakat Kabupaten Bandung.
