GALURA - Kana 3500 tina 4700 imah di Desa Margahayu Tengah (Marteng), Kecamatan Margahayu, Kabupaten Bandung cai bersihna tina sababaraha hiji titik sumur bor nu dikokolakeun ku Bumdes satempat. Sèsana ihtiar sorangan meunangkeun cai beresihna.
Bupati Bandung Dadang Supriatna, waktu Rembug Bedas di Desa Marteng sawatara waktu kaliwat, nawarkeun kamungkinan gawè bareng jeung PDAM pikeun nyumponan cai beresih warga Desa Marteng.
Kana hal ieu, Kepala Desa Marteng Asep Zaenal Mahmud nyebutkeun, warga Kecamatan Margahayu, hususna Desa Marteng kacida butuheun cai ti PDAM ( Perumda Air Minum Tirta Raharja).
Asep nètèlakeun, sawatara can aya PDAM, pamarèntah Desa Marteng ti 2014 narèkahan nyieun sumur bor tuluy disalurkeun ka imah warga.
Baca Juga: Rembug Bedas di Kecamatan Margahayu Bupati Bandung Narima Bangbaluh Warga Dua Desa
"Sim kuring nyanggakeun sagemblengna ka warga, engké ka payun pami wacana PDAM janten lebet ka Desa Marteng, mangga waè warga badè ngagunakeun cai ti sumur bor nu dikokolakeun Bumdes, badè ti PDAM, badè duanana atanapi heuteu suanana ogè, " ceuk Asep Zaenal Mahmud di kantorna, Rebo (5/4/2023).
Pangokolaan cai beresih di desana salila ieu, ceuk Asep, ukur nyubadanan kawajiban nyumponan kabutuhan cai beresih warga masarakat. Anapon wacana lamun ngamungkinkeun aya jalur pipa cai PDAM , ceuk Asep, di Marteng mah tos 3000 leuwih ti nu dikokolakeun Bundes.
"Lebar upami kedah diwangun deui jaringan PDAM. Biaya sambungaana ogè rupina awis," ceuk Asep.
Kahayang Asep mah aya kawijakan saluran pipa tèh diasupkeun kana toren- toren nu geus aya, sahingga jaringan pipa nu geus aya tina swadaya masarakat bakal mubah.