GALURA – Field Trip Sekolah Alam Quran Nur Madani ka Taman Hutan Raya (Tahura) Djuanda di kawasan Dago, Kota Bandung, Salasa, 7 Maret 2023.77
Eta acara anu diiluan ku 71 murid TK kasebut, minangka bagean tina Penilaian Tengah Semester.
Kepala Sekolah Alam Quran Nur Madani, Ira Pitriawati STP MM, ngeceskeun, dibarung tema “Explore The Nature”, kasang tukang kagiatan Field Trip teh sangkan pangajaran di luareun kelas ge nodel kana kaayaan alam.
Baca Juga: Damkar Kuningan, Ngawanohkeun Bahaya Kahuruan ka Murid-Murid TK
Neuleuman pangajaran kalawan nyata pikeun mikawanoh leuwih jero fenomena alam hususon bab flora, nyaeta rupaning jenis pepelakan sabudeureun Tahura Djuanda.
“Dipiharep barudak ge tumuwuh rasa miduli jeung micinta lingkungan alam,” pokna.
Lian ti eta, sangkan barudak mikanyaho tempat-tempat nu mibanda sajarah di Tahura Djuanda minangka hutan konservasi.
Tempat-tempat nu mibanda ajen sajarah di Tahura Djuanda di antarana Guha Jepang jeung Guha Belanda.
“Ku ayana eta Field Trip, aya adumanis antara pangajaran alam flora jeung sajarah perjoangan bangsa,” ceuk Ira Pitriawati.
Sekolah Alam Quran Nur Madani teh perenahna di Kampung Tutugan, Desa Cihanjuang Rahayu, Kecamatan Parongpong, Kabupaten Bandung Barat.***