Network
GALURA -Sistematika Syeh Abdul Muhyi dina ngajar santri dicatet ku salahsaurang muridna, ku Syeh Nurhuda nu saterusna dijadikeun kitab atawa buku. Dina bukuna, Syeh Nurhuda nulis sistematika pangajaran Syeh Abdul Muhyi.
Pangajaran munggaran ceuk buku susunan Syeh Nurhuda santri kudu mibanda batin nu kuat jeung teu ham-ham kana ajaran agama Islam. Dina sistematika pangajaran Syeh Abdul Muhyi, kuatna kayakinan kana agama islam tatapakanana dina neuleuman agama Islam.
Sanggeus kitu, dina sistematika pangajaran Syeh Abdul Muhyi sakumaha nu ditulis ku Syeh Nurhuda, santri diajarkeun ngeunaan katauhidan: ajaran ngeunaan Alloh teh ngan hiji, sakumaha nu kaunggel dina Surat Al-Ikhlas.
Baca Juga: Sultan Cirebon Dijajah ku Kumpeni jeung Belanda Kakawasaanana Dicabut
Sanggeus mibanda kayakinan dina tauhid, karek diajarkeun bag-bagan sejenna, babakuna rukun Islam. Saterusna ajaran Islam ngeunaan kamasarakatan nu sipatna horizontal.
Ku santri-santri Syeh Abdul Muhyi, sistematika pangajaran Syeh Abdul Muhyi nu dibukukeun ku Syeh Nurhuda diterapkeun di pasantren nu diadegkeun di daerahna sewang-sewangan.
Santri Syeh Abdul Muhyi kawilang loba. Lain ukur urang Tasikmalaya, tapi oge ti kabeh wewengkon Jawa Barat: Indramayu, Cirebon, Ciamis, Cibaduyut (Bandung), jeung Cianjur malah santri ti Jawa Timur oge rea, di antarana ti Jember.
Santri-santri Syeh Abdul Muhyi loba nu ngadegkeun pasantren di lemburna seawang-sewangan.
Santri Syeh Abdul Muhyi nu ngadegkeun pasantren teh di antarana Abdul Qohar di Bantarkalong, Khatibul Muwahid di Panyalahan, Abdul Qoloq di Banagara, jeung rea-rea deui.
