Network
GALURA -Kabupaten Sukapura (ayeuna Kabupaten Tasikmalaya jeung Kota Tasikmalaya) dibentuk atawa diadegkeun bareng jeung Kabupaten Bandung katut Kabupaten Parakanmuncang. Tiluanana bisa disebutkeun hadiah ti Sultan Agung.
Dibentukna Kabupaten Sukapura, Kabupaten Bandung jeung Kabupaten Parakanmuncang teh kadeudeuh ti Sultan Agung keur tilu urang kepala daerah atawa umbul nu dianggap gede jasana dina mareuman baruntakna Dipati Ukur.
Sultan Agung ngajenengkeun Ki Astamanggala, umbul Cihaurbeuti (Ciahurbeuti ayeuna asup ka Kabupaten Ciamis) jadi bupati di Kabupaten Bandung, Ki Wirawangsa, umbul Sukakerta jadi bupati di Kabupaten Sukapura, jeung Ki Somahita, umbul Sindangkasih jadi bupati di Kabupaten Parakanmuncang.
Ki Astamanggala sanggeus jadi bupati Bandung, gelarna Tumenggung Wiraangunangun, Ki Wirawangsa jadi bupati Sukapura, gelarna Tumenggung Wiradadaha, jeung Ki Somahita jadi bupati Parakanmuncang, gelarna Tumenggung Tanubaya.
Dilantikna umbul tadi jadi bupati ditulis dina Piagem Sultan Agung nu ngagunakeun pananggalan Jawa-Islam. Aya dua piagem nu dikaluarkeun ku Sultan Agung teh: ngeunaan dilantikna tilu umbul bieu, tanggal 9 Muharam taun Alip (Piagem I) jeung dibentukna Kabupaten Sukapura, tanggal 9 Muharam taun Jimakhir (Piagem II).
Tanggal 9 Muharam taun Alip ditafsirkan sarua jeung tanggal 16 Juli 1633 atawa 20 April 1641. Tanggal 9 Muharam taun Jimakhir ditafsirkan sarua tanggal 26 Juli 1632 atawa tanggal 30 April 1640
Ceuk parasajarawan, informasi tina dua piagem teh fakta kuat (hard fact) ngeunaan dibentukna Kabupaten Sukapura. Aya sababaraha pilihan titimangsa milangkala Kabupaten Tasikmalaya. Bisa dumasar Piagem I (16 Juli 1633 atawa 20 April 1641) jeung bisa dumasar Piagem II (26 Juli 1632 atawa 30 April 1640).
Baca Juga: Raden Dewi Sartika Hayang Ngadegkeun Sakola Mimitina Teu Diidinan Bupati Bandung
