Network
GALURA – Bupati Ciamis, Herdiat Sunarya, waktu kampanye dina pemilihan kepala daerah (Pilkada), 27 Juni 2018, jangji ngaakomodir pamaredih digantina ngaran Kabupaten Ciamis jadi Kabupaten Galuh. Dina taun kaopat kapamingpinana, Bupati Ciamis ngasosialisasikeun parobahan ngaran Kabupaten Ciamis jadi Kabupaten Galuh
Sosialisasi diganti ngaranna Kabupaten Ciamis jadi Kabupaten Galuh teh ti camat ka kepala desa, kepala desa ka masarakat. Hasil kasapukan masarakat ti unggal desa dipasrahkeun ka Bupati Ciamis. Dumasar hasil kasapukan masarakat, pemkab Ciamis bakal menta kajian ilmiah ka akademis nu engkena dibasa di DPRD.
Awalna proses digantina ngaran Kabupaten Ciamis jadi Kabupaten Galuh lumangsung lungsur-langsar. Nu meredih Kabupaten Ciamis balik deui jadi Kabupaten Galuh gede harepan pamaredihna ganjang ngawujud sarta ngaran Galuh bakal mawa parobahan, boh keur masarakatna boh keur pamarentahanana.
Beh dieu muncul masarakat nu nolak digantina ngaran Kabupaten Ciamis jadi Kabupaten Galuh. Tokoh agama di Kawali, Dr. H. Iif Taufiq El Haque, S.Kep, Ners, M.H.Kes, upamana nyebutkeun sacara pribadi teu satujueun ngaran Kabupaten Ciamis diganti jadi Kabupaten Galuh.
Iif Taufiq El Haque nyebutkeun Galuh teh spirit, ajen-inajen, nu aya dina batin masarakat Kabupaten Ciamis. Leuwih hade teu dijadikeun ngaran kabupaten. “Galuh teh cara para raja-raja di Tatar Ciamis nu ngeuyeuk dayeuh ngolah nagara,” pokna.
Dipikahariwang, mun Kabupaten Ciamis jadi Kabupaten Galuh, ceuk Iip, ritual atawa adat istiadat samemeh Islam asup hudang deui, tanda-tanda hal eta geus katempo. Padahal eta teh lain kaasup budaya Galuh. Dipikahariwang deui engke bakal ngabalukarkeun konflik horizontal, nu tangtu wae bakal ngaganggu kana pangwangunan di daerah.
Ceuk Iif Taufiq El Haque batan tanaga, pikiran jeung waragad dipake pikeun ngaganti ngaran Kabupaten Ciamis jadi Kabupaten Galuh, leuwih hade dipake keur ngabangun daerah, dipake keur ngaraharjakeun masarakat.
