Network
GALURA -Naon ari kabuyutan? Kabuyutan di jaman bihari minangka pamager lembur, ngalaksanakeun parentah raja, mupusti amanah para luluhur jeung mageran pangaruh fihak sejen anu bakal ngarugikeun kana tatanan kahirupan lahir batin.
Kabuyutan oge tempat medalna papagon, tetekon, aturan, ugeran, jeung
Tempat raja ngageuing raja mun ucap, tekad jeung lampahna mengpar tina kamanusaan.
Ngeunaan kabuyutan aya hiji dongeng anu henteu kungsi kacatet dina lambaran sajarah, nalika Prabu Siliwangi ngawangun benteng Pajajaran. Inyana ngaluarkeun titah atawa parentah ka balarea.
Baca Juga: Putri Anjungsari (18)
Ceuk Prabu Siliwangi: mihape leuweung tutupan, mihape leuweung titipan. piara leuweung garapan. Ieu aya patalina jeung kabuyutan.
Harti leuweung tutupan: leuweung anu ngandung sajarah kahirupan bangsa jeung nagara. Leuweung tutupan sama sakalu teu meunang diganggu.
Anu disebut leuweung titipan hartina leuweung titipan para luluhur anu disebut kabuyutan. Di dinya sok aya tempat ngariung para intelektual jaman baheula.
Ari leuweung garapan hartina leuweung anu bisa digarap pikeun kapentingan kahirupan balarea.
Ti kabuyutan lahir palanggeran, tetekon, papagon nu kudu diestokeun boh ku raja boh ku rayat.
Dina soal miara lingkungan aya papagon: leuweung kaian, lamping awian, lengkob baseuhan. Pelakan leuweung ku tatangkalan sangkan mere kahirupan jeung huripna.
Dina lamping pelakan awi, sabab awi boga kauatan pikeun nahan urug.Lengkob baseuhan, dina lengkob kudu dibendung keur ngawadahan cai sabab cai sumber karahayuan dina kahirupan lahir jeung batin.
Kacida pisan bijakna luluhur Ki Sunda dina miara, ngaraksa tur mirosea alam jeung lingkunganana.
Hanjakal urang rundayanana sakapeung mopohokeun kana amanah para luluhur, tibra teuing ngeukeupan impian dipepende ku katamakan jeung kasarakahan.
Konsep kabuyutan beuki dieu beuki dipopohokeun. Kiwari anu nyesa the kabuyutan Ciburuy di tutugan Gunung Cikuray di Kabupaten Garut. Kitu oge ukur tempat neundeun naskah-naskah kuna.***
