Network
GALURA.CO.ID -Direksi Bank Perkreditan Rakyat (BPR) Kerta Raharja Kabupaten Bandung ngayakeun halal bihalal jeung puluhan wartawan media cetak, eletronik jeung online di salasahiji rumah makan di Jalan Gading Tutuka, Soreang, Kemis, 25 April 2024.
Direktur Utama BPR Kerta Raharja Ir. H. Aep Hendar Cahyad nètèlakeun, halal bihalal teh pikeun mageuhkeun tali silaturahmi BPR jeung awak media luyu jeung jejer halal hihalal: "Melalui Halal Bihalal Kita Jalan Kemitraan yang Harmonis antara Bank Perkreditan Rakyat Kerta Rahaja dengan Media."
Aep Hendar Cahyad nerangkeun, utamana patali salasahiji tina 13 program prioritas Bupati Bandung, Dadang Supriatana nyaèta injeuman dana bergulir teu makè jaminan jeung teu bungaan. Ieu program lain hibah.
"Upama hibah mung sakali, ukur salangkung. Tapi upami dana bergulir BPR ngabina UMKM sareng para pangusaha alit nu cohagna tos keuna balukar sasalad covid -19. Nya ieu tèh bongbolongan ti Pemkab Bandung nu diarahkeun ku Pak Bupati Bandung nu kacida Bedas," ceuk Aep dina lolongkrang halal bihalal.
Ceuk Aep, media kudu ngabantu nepikeun ka masarakat sangkan apaleun jeung robah pamahaman masarakat teu nganggap deui dana bergulir teh hibah.
BPR Kerta Raharja, ceuk Aep tepi ka April 2024 geus nyalurkeun kredit bergulir ka 26 rèbu debitur kalayan total dana kana Rp54 miliar. Puluhan rèbu debitur ti rupa-rupa jenis usaha leutik jeung sedeng.
"Pinjaman bergulir kanggo masarakat tiasa mekar ti Rp 2 dugi ka Rp 500 juta. Kumargi pangusaha ageung ogè teu ujug-ujug ageung," ceuk Aep.
Aep nyebutkeun mimiti Rp2 juta teu bungaan jeung jaminan lamun lancar bisa tepi ka Rp 5 juta. "Tapi saatos Rp 5 juta Pa Bupati bakal masihan deui program Kurda (Kredit Usaha Rakyat Daerah). Tiasa waè dugi ka Rp 500 juta, tapi bungana tiasa diset kirang ti 5 persen. Hartosna nu sèsana ku Pemkab dipasihan subsidi deui, " ceuk Aep.*** Sopandi
