Network
GALURA.CO.ID- Ketua DPRD Kabupaten Bandung, Sugianto nyebutkeun Rencana Tata Ruang Wilayah (RTRW) Kabupaten Bandung nu anyar mastikeun sangkan Usaha Menengah Kecil Mikro (UMKM) nu geus ngeureuyeuh puluhan taun ditangtayungan sajalan rencana pangwangunan di Kabupaten Bandung.
Hal ieu ditepikeun Sugianto dina Rapat Lintas Sektor RTRW Kabupaten Bandung nu diiluan ku Pamarèntah Kabupaten Bandung babarengan jeung Dirjen Tata Ruang Kementerian PUPR RI, Kemis 14 Septemner 2023.
“Salami ieu UMKM tos ngajalankeun usaha, tapi kumargi kapungkur teu acan aya soal rencana tata ruang nu jelas aranjeunna hariwangeun kenging masalah di ATR/BPN,” ceuk Sugianto.
Baca Juga: H. Amim Meriatna Subhan: Jadi Pinunjul FTBI Kabupaten Bandung Ulah Jadi Udagan
DPRD, ceuk Sugianto siap ngarojong Kabupaten Bandung dina lebah kawijakan tata ruang. “Simkuring teras koordinasi sareng sinergi sareng Pemkab Bandung. Kitu ogè antara Pemkab Bandung sareng pamarètah pusat,” pokna.
Bupati Bandung, Dadang Supriatna ngajelaskeun, konsep ngamotekarkeun RTRW Kabupaten Bandung didadasaranan kana sababaraha aspek: Kawijakan spasial jeung sektoral, sistem penggunaan lahan, kapendudukan, ekonomi, jeung aspek sosial-budaya.
Kabupaten Bandung, ceuk Dadang Supriatna, bagèan tina Bandung Metropolitan nu ngawengku wilayah Kota Bandung, Kota Cimahi, Kabupaten Bandung Barat, katut sawarèh wilayah Kabupaten Sumedang.
“Tos aya kasapukan ngintegrasikan akses transportasi, komo deui ayeuna tos aya stasiun Kereta Cepat Indonesia-China (KCIC) sareng jaringan tol Getaci nu asup kana RTRW Kabupaten Bandung,” pokna. *** Sopandi
