Network
GALURA.CO.ID -Bupati Bandung Dadang Supriatna mernahkeun batu munggaran dimimitianana ngawangun Rumah Sakit Umum Daerah (RSUD) Bedas Bojongsoang di Desa Tegalluar, Kecamatan Bojongsoang, Kabupaten Bandung, Rebo 13 September 2023.
RSUD nu diadegkeun di lahan sahektar leuwih tèh ditaksir mèakeun anggaran kana Rp31 miliar. Ceuk Dadang Supriatna, pangwangunan RSUD Bedas Bojongsoang teh tarèkah pamarèntah daerah dina nyayagiikeun panglayan kasèhatan pikeun masarakat.
Dadang Supriatna ngaku ngarasa bungah kacida sabab salasahiji impianana nyaèta hayang ngadegkeun rumah sakit agrèng di lemburna ngawujud sanggeus dirina jadi bupati. "Ieu rumah sakit disanggakeun kanggo masarakat Bojongsoang sareng sabudeureunana,," ceuk Dadang Supriatna.
Baca Juga: Para Petetan Jawara Nulis di SDN Lebakwangi 01 Arjasari Kabupaten Bandung
Waktu jadi Kepala Desa Tegalluar umur Dadang Supriatna 26 taun. Ceuk Dadang Supriatna, tiheula masarakat di wilayah Bojongsoang utamana Tegalluar hèsè mawa warga nu gering tur kudu dirawat.
Pangdeukeutna rumah sakti paling dibawa ka RSUD Al Ihsan Baleendah atawa ka RSUD Hasan Sadikin Bandung. Ku kituna inyana ngaku bungah tur reueus ayeuna bisa ngawujudkeun impianana.
RSUD Bedas Bojongsoang tèh rumah sakit kaopat nu geus diwangun Bupati Bandung Dadang Supriatna salila dua taun mingpin Kabupaten Bandung.
Samèmèhna, Dadang Supriatna geus ngabangun jeung ngaresmikeun dua RSUD: RSUD Bedas Kertasari jeung RSUD Bedas Cimaung. Iwal ti èta, danget ayeuna keur dibangun RSUD Bedas Banjaran, jeung awal taun 2024 engkè bakal dibangun RSUD Bedas Pacira.*** Sopandi
