Network
GALURA.CO.ID -Dinas Komunikasi dan Informatika, Persandian dan Statistik (Diskominfo) Kabupaten Bandung rèk ngadegkeun Kelompok Informasi Masyarakat (KIM) nu basisna pelajar. Ieu KIM teh munggaran di Indonesia.
Dibentukna KIM pelajar didadasaran ku ngaronjatna kagiatan media sosial di kalangan pelajar nu kamungkinan gedè bisa jadi sumber pasualan kahareupna, umpamana warta bohong (hoaks), cyberbullying, panipuan, eksploitasi seksual, jeung sajabana.
Kepala Diskominfo Kabupaten Bandung, Yosep Nugraha miharep sangkan KIM nu basisna pelajar bisa dibentuk di Kabupaten Bandung sabab bisa nyinglar sumebarna hoaks turta potensi masalah digital lianna di lingkungan pendidikan.
Baca Juga: Galura Cetak III September 2023, Ritual Nyuguh di Kampung Kuta Ciamis dina Kaayaan Tigerat ku Cai
Di hareupeun siswa SMAN 1 Pangalengan, Salasa, 12 September 2023, inyana neueulkeun pentingna 4 pilar digital dina ngagunakeun media sosial.
Eta pilar teh kamampuan (skill) digital, budaya (culture) digital, etika (ethics) digital, jeung kaamanan (safety) digital. Ieu perlu dikawasa entragan ngora sangkan bisa media sosial jadi wadah nu aman, sehat, jeung produktif.
“Iwal ti wajib uninga gadget nu ku urang dianggo jenisna naon, fungsina naon, atawa kumaha cara nganggona, urang ogè peryogi ngagunakdeun digital kanggo mageuhkeun persatuan bangsa,” ceuk Yosep dina Seminar Bijak Memanfaatkan Media Sosial Cegah Hoaks nu diayakeun ku KIM Kabupaten Bandung.
Inyana ngajelaskeun pentingna ngagunakeun etika dina ngagunakeun media sosia. Saperti: dipahing ngahina, nyarita kaceuceub, atawa ngaliarkeun warta hoaks. Yosep ogè ngèlingan sangkan ati-ati kana data pribadi nu sumebar di dunia maya teu disalahgunakeun ku batur.
Dina ieu kagiatan kalawan pamilon para pelajar SMAN I Pangalengan nara sumber sejenna: Atep Kusman, Kang Yayat, jeung Adhie Nur Indra, Pranata Humas Diskominfo Kabupaten Bandung.*** Sopandi
