Network
GALURA.Co.ID -Bupati Bandung, Dadang Supriatna, nandeskeun komitmenna pikeun ngamulyakeun para guru ngaji ku ngaluarkeun dana insentif saban bulan. Ti munggaran mangsa jabatanana tug tepi ka danget ieu Dadang Supriatna geus ngaimplementasikeun program-programna kalayan konsisten.
Kituna ditepikeun Dadang Supriatna waktu masrahkeun bantuan sembako sacara simbolis keur para guru ngaji di Kecamatan Bojongsoang, Kabupaten Bandung, Juma'ah, 09 Pebruari 2024. Paket sembako nu dibagikeun ka 15.666 guru ngaji di Kabupaten Bandung bareng jeung mièling Isra’ Mi’raj.
Ceuk Bupati Bandung, ieu kagiatan teu ukur jadi momentum pikeun ngabantu guru ngaji nu geus aub kana hal penting dina nyumebarkeun èlmu agama, tapi ogè minangka wujud pamarèntah malire jeung merhatikeun ka guru ngaji. Guru ngaji teh penting pisan dina syiar agama Islam.
“Hatur nuhun ka Bapa Ibu guru ngaji sakumna, upami teu aya para guru ngaji simkuring ham-ham warga Kabupaten Bandung bakal tiasa ngaos Al-Quran,” ceuk Dadang Supriatna. Inyana nepikeun kahariwangna kana degradasi moral. Tina kituna guru ngaji kacida penting pikeun nyinglar hal-hal nu teu dipiharep.
“Ieu program (intensif keur guru ngaji di Kabupaten Bandung nu ditarima mayeng ngocor unggal bulan) salasawios tarèkah kanggo ngajagi karakteristik sareng ahlak boh umumna masarakat Kabupaten Bandung, boh hususna entragan ngora,” ceuk Dadang Supriatna.
Kepala Dinas Ketahanan Pangan dan Perikanan (Dispakan) Kabupaten Bandung, Ina Dewi Kania, nambahkeun babagi sembako ogè pikeun ngabantu ngadalikeun harga bahan pangan, hususna bèas, tur nyengker inflasi di Kabupaten Bandung.
“Ieu program tos janten prioritas pamarèntah Kabupaten Bandung nu teu mung jangji Bupati, tapi ogè wujud perhatosan pamarèntah dina ngamulyakeun ulama,” ceuk Ina.
