Network
GALURA.CO.ID -Panitia Pengawas Pemilihan Umum Kecamatan (Panwascam) Tanjungmedar, Kabupaten Sumedang, Jawa Barat, ti mimiti kampanye tatap muka 28 November 2023 jeung kampanye rapat umum 21 Januari 2024 - 10 Februari 2024 teu weleh nalingakeun lumangsungna kampanye.
“Panwascam Tanjungmedar mastikeun kampanye nohonan aturan kampanye dumasar Undang-Undang nomor 7 Tahun 2017 ngeunaan Pemilu,” ceuk Ketua Panwascam Tanjungmedar, Ani Siti Maryani, waktu jumpa pers, Saptu, 3 Februari 2024, di kantor Panwascam Tanjungmedar.
Ani netelakeun tim kampanye memehna kudu ngabejaan Panwascam, PPK (Panitia Pemilihan Kecamatan) jeung kapolisian. “Upami tea mah teu ngabejaan heula, taya konfirmasi heula, Panwascam wajib ngalarang kampannye,” pokna.
Baca Juga: Loba Laporan Dirempakna Aturan Kampanye, Ngan Teu Diproses ku Panwascam Margahayu Kabupaten Bandung
Di KPU Sumedang tahapan kampanye terbuka atawa rapat Umum 21 Januari – 10 Februari 2024 jadwalna geus aya di KPU Sumedang. Panwasam tinggal ngadagoan surat nu ngabejaan kampanye terbuka. Najan kitu tim kampanye tetep kudu ngabejaan Panwascam, teu cukup geus aya jadwalna di KPU Sumedang.
“Panwascam Tanjungmedar fokus kana kampanye nu ngawates. Di Kecamatan Tanjungmedar teu acan aya rapat umum,” pokna.
Ani oge ngelingan sangkan mahing politik uang (money politic). Panyalagra Pemilu kudu nyontoan nu hade najan mibanda prefensi pulitik. Ku cara kitu Pemilu 2024 jadi leuwih hade jeung demokratis.
Pikeun nalingakeun Tempat Pemungutan Suara (TPS), Panwascam Tanjungmedar geus ngistrenan 86 urang patugas Pengawas TPS sarta jadi ujung tombak Bawaslu RI.
Di sisi sejen Panwascam Tanjungmedar geus ngirimkeun surat ka PPK ngeunaan perluna nartibkeun Alat Peraga Kampanye (APK) ka Bawaslu Kabupaten Sumedang. “Anu nartibkeun APK-na Satpol PP Kabupaten Sumedang,” ceuk Ani.
