Network
GALURA - Bupati Majalengka, Dr. H. Karna Sobahi, M.M.Pd., ngaluuhan diistrenanana pangurus Dewan Pengurus Daerah Komite Nasional Pemuda Indonesia Kabupaten Majalengka (DPD KNPI Kabupaten Majalengka) entragan 2023-2026 (30/05/2023), di Gedong Graha Sindangkasih Majalengka.
Pangurus DPD KNPI Kabupaten Majalengka entragan 2023-2026 dipupuhuan Anto Febrianto, M.Pd; Ketua Harian: Dery Dwi Permadi, S.IP.; Sekretaris: Muh Nur Jummu J CH; Bendahara: Muhammad Habibie, M.Hum.
Pangurus DPD KNPI Kabupaten Majalengka 2023-2026 diistrenan sacara resmi ku Ketua DPD KNPI Provinsi Jawa Barat.
Baca Juga: Hari Jadi Kabupaten Majalengka Dumasar Mitos jeung ukur Dilelebah
Ketua umum DPD KNPI Kabupaten Majalengka anyar diistrenan, Anto Febrianto, M.Pd., nyebutkeun KNPI Kabupaten Majalengka kudu aktif dina pangwangunan pikeun ngawujudkeun kamajuan daerah.
Tina kituna, lengkah munggaran nu bakal dilaksanakeun: konsolidasi boh internal boh eksternal.
"Konsolidasi internal bakal dilaksanakeun orientasi pangurus DPD KNPI Kabupaten Majalengka. Konsolidasi eksternal bakal ngogan sakumna ketua organisasi kapemudaan nu jumlahna 72 OKP, tujuanna pikeun leuwih ngaraketkeun silaturahmi sarta ngarojong supados tiasa ngawujudkeun ide sarta gagasan sateuacan ngalaksanakeun rapat kerja daerah DPD KNPI Kabupaten Majalengka," ceuk Anto
Pihakna bakal ngaraketkeun kamitraan tur kolaborasi jeung Pemda Majalengka sarta stakeholder lianna. Salian eta oge KNPI bakal tuluy aktif dina satiap kawiijakan palaksanaan program pamarentah oge sharing ide tur gagasan pikeun ngawujudkeun Majalengka Raharja.
Baca Juga: Porsenitas X Taun 2023 Dibarengkeun jeung Mieling Hari Jadi ka 533 Kabupaten Majalengka
"Dina rapat kerja daerah DPD KNPI Kabupaten Majalengka, bakal fokus di program kawijakan di widang kamotekaran SDM pamuda, babakuna di widang pangaweruh, ekonomi, tur kasehatan," pokna.
Anton nyebutkeun pamuda Majalengka kudu jadi pamuda nu pikiranana sehat, sehat jasmani sareng sehat rohani sarta ide-ide tur gagasanna mampuh aya kontribusina kangge kamajengan Kabupaten Majalengka.
Bupati Majalengka kalayan asma pamarentah daerah Kabupaten Majalengka, ngawilujengkeun tur ngapresiasi ka pangurus DPD KNPI Kabupaten Majalengka entragan 2023-2026 nu anyar diistrenan.
Bupati Majalengka miharep kapangurusan DPD KNPI Kabupaten Majalengka entragan 2023-2026 bisa leuwih kolaborasi, komunikasi sarta ngamitra, boh jeung Pemda Majalengka boh jeung stakeholder sejenna.
Baca Juga: Ti 1 Juni 2023 Kareta Api nu Eureun di Stasiun Ciamis Leuwih Loba
"Hal eta tangtosna kangge langkung motekarkeun kamitraan KNPI Kabupaten Majalengka ka pihak sanes. Seueur OPD nu tiasa di mitrakeun sareng agenda KNPI. Ku kituna sinergi antawis KNPI sareng Pemda Majalengka bakal tiasa ngahasilkeun hal nu ageng mangpaatna kangge masarakat Kabupaten Majalengka,” ceuk Bupati.
Bupati oge miharep KNPI mampu nempatkeun diri dina sagala widang dina harti, KNPI lain wae aub dina satiap Sumpah Pemuda 28 Oktober. Tapi karasa kontribusina ku hal-hal nu inovatif.
"Wilujeng mancen tugas, wulujeng koordinasi, kolaborasi tur inovasi dina ngajaga dangiang KNPI di Kabupaten Majalengka," ceuk Bupati.
Diistrenana DPD KNPI Kabupaten Majalengka Oge diluuhan ku Ketua DPRD Kabupaten Majalengka, rengrengan Forkopimda, Ketua DPP KNPI Nasional.
Ketua DPD KNPI Jawa Barat, sakumba Kepala OPD, sakumna camat, Ketua Bawaslu, Ketua Baznas Kabupaten Majalengka, Ketua KONI Kabupaten Majalengka, ketua organisasi masarakat, organisasi kapemudaan di Kabupaten Majalengka, sarta pangurus DPD KNPI Kabupaten Majalengka.*** Ayank R Sambara
