Network
GALURA -Ngaran masigitna teh Tajug Gede Cilodong, dibangun ku pamarentah Kabupaten Purwakarta jaman dibupatian ku Dedi Mulyadi, pernahna di Cilodong teu jauh ti pantol Cikopo. Tajug Gede Cilodong ngait kana budaya Sunda.
Ku sabab ngait kana budaya Sunda pangna ku pamarentah Kabupaten Purwakarta dingaranan Tajug Gede Cilodong teh henteu make ngaran Masjid Cilodong upamana. Istilah tajug memang geus lila dipake tepi ka teu bisa dipisahkeun jeung budaya Sunda
Dina budaya Sunda anu ngarannna tajug teh istilah keur masigit leutik, biasana ngadeg di teu jauh ti lahan tatanen, kebon, jeung di pilemburan. Eta lantaranana masjid di Cilodong Kabupaten Purwakarta tajugna make kecap gede: Tajug Gede Cilodong lantaran tajugna henteu leutik.
Baca Juga: Kampung Mahmud Bihari jeung Kiwari, Imah Panggung geus Langka
Tajug Gede Cilodong, hateupna umpak tilu, pilar aya opat, bedugna aya salapan. Unggal jumahaan bedug ditabeuh ku salapan urang, jeung muazinna salapan urang. Adzan munggaran jeung ngunggahkeun khotib adzanna bareng.
Ketua Dewan Kemakmuran Mesjid (DKM) Tajug Gedé Cilodong, H. Dedi Mulyadi, nyebutkeun dibangunna Tajug Gede Cilodong téh kainsfirasian ku amanat Sunan Gunung Jati nalika rék tilar dunya.
Amanat Sunan Gunung Jati: Kula nitip tajug jeung fakir miskin. Ku kituna, “simkuring nalika ngajabat bupati Purwakarta ngahaja ngawangun mesjid nu dingaranan Tajug Gedé Cilodong,” ceuk Dedi Mulyadi.
Naha diadegkeun di Cilodong? ”Wewengkon Cilodong kantos janten tempat prostitusi. Ku simkuring lahanna dimangpaatkeun pikeun diadegkeun masjid nu ornamen-ornamenna ngadumaniskeun antara kaagamaan jeung kasundaan nu arsitekturna nyoko budaya Sunda,” ceuk Dedi Mulyadi.
Baca Juga: Sompral, Suaban Ngandung Gambaran Kasombongan, Kudu Disinglar, Matak Cilaka
