Ciamis Lain tina Kecap Cai Hanyir, Tapi Ngaran Tempat nu geus Lila Aya

GALURA -Ngeunaan ngaran Ciamis, aya nu boga pamanggih Ciamis lain asalna ti kecap amis basa Jawa atawa basa Cirebon. Ciamis, tadina ngaran tempat, bisa jadi deuih ngaran walungan atawa susukan.

Ciamis dipaké ngaran kabupatén lantaran puseur dayeuhna di Ciamis. Lamun puseur dayeuhna di tempat séjén, di Kawali, di Panjalu, upamana moal maké ngaran Ciamis, tapi maké ngaran Kabupatén Kawali, Kabupatén Panjalu.

Dipake ngaran tempat keur ngaran pamarentahan di urang mah geus prah di mana-mana, lain ukur ngaran tempat Ciamis dipake ngaran kabupaten, Kabupaten Ciamis.

Geura, Kasultanan Mataram sohorna mah ku ngaran Kasultanan Yogyakarta, pedah puseur dayeuh Kasultanan Mataram di Yogyakarta. Nu kakoncarana teh ngaran puseur dayeuhna lain ngaran kasultanna.

Baca Juga: Kawali Jadi Puseur Karajaan Sunda Galuh, Ngahiji jeung Karajaan Sunda Puseur Karajaan Pindah ka Pakuan

Karajaan Pajajaran, éta téh pédah puseur dayeuhna di Pakuan Pajajaran, padahal ngaranna mah Karajaan Sunda.

Tah, ngaran Ciamis oge kawasna lain ngaran panghina ti urang Cirebon atawa ti urang Mataram. Ciamis lain tina kecap cai hanyir, cai nu hanyir.

Pikeun muguhkeun naha enya Ciamis asalna ngaran tempat atawa walungan tangtu waé perelu panalungtikan nu gemet, babakuna panalungtikan ngeunaan ngaran-ngaran tempat di Kota Ciamis ayeuna jeung ngotéktak peta-peta heubeul, jaman Kumpeni (VOC). ***