Network
GALURA – Naon ari sihir? Teu mencog, meh sarerea apal atawa saeutikna kungsi maca atawa ngadangu eta kecap.
Enya, sihir teh salahsahiji elmu mistik. Ngan, sumberna lain tina Al Quran, tapi ti sumber anu nyata-nyata kudu dijauhan jeung disinglar. Setan.
“Elmu sihir teh nyaeta elmu mistik nu sumberna ti setan,” kitu cek Drs. KH. Badruddin Hsubky dina bukuna “Bid’ah Bid’ah di Indonesia.”
Nurutkeun inyana, elmu sihir teh memang aya. Apanan dina Al Quran ge sihir kasebut nepi ka 62 kalina, upamana dina QS Al Baqarah 102.
Eta teh kaasup nu aya dina QS Al Falaq nu unina “wamin syarrin naffaatsaati fil ‘uqad”.
“Numutkeun Imam Mujahid, Ikrimah jeung Imam Hasan (eta ayat), mibanda harti jentre, nyaeta “tiupan-tiupan tukang sihir,” cek Drs. KH. Badruddin Hsubky.
Nu disebut sihir, santet atawa teluh, ti jaman beh ditu memang geus aya. Nu keuna ku pangaruhna, lain wae jalma biasa atawa pantar raja, dalah Rasulullah Saw ge ngalaman. Eta hal sakumaha anu dipertelakeun ku Ibnu Katsir nalika murak hiji hadist Nabi.
Baca Juga: Cenah di Demak Jawa Tengah Tara Aya Gelap da Ditewak ku Ki Ageng Selo
Cek Ibnu Katsir, nalika Rasulullah Saw teu damang, dilongok ku dua malaikat. Eta malaikat, nu hiji calik caket mastaka Rasul, nu hiji deui caket sampean Rasul. Harita duanana ngalobrol, tur kadangu pisan ku Rasul.
Malaikat A : Alatan naon ieu lalaki geringna?
Malaikat B : Disihir jalma
Malaikat A : Ku naon disihirna?
Malaikat B : Ku buuk nu dijieun kawas boneka, terus ditojos jarum
Malaikat A : Di mana bonekana?
Baca Juga: TPPAS Legok Nangka Ngagantung Keneh, Can Aya Pausaahaan nu Meunang Tender
Malaikat B : Diasupkeun kana sintung korma, terus diteundeun dina handapeun batu gede di sumur Darwan.
Malaikat A : Saha nu nyihirna?
Malaikat B : Lubeld bin Asham, urang Yahudi.
Sabada ngobrol, eta dua malaikat teh ilang duka ka mana.
Baca Juga: Pikeun Ngaronjatkeun Pangladen ka Warga, RSUD Kota Bandung Waragadna Rp 516 Miliar
Saterasna, Rasul nu ngadangu pisan eta obrolan ngajurungan Ali, Juber jeung Amar bin Yasir, muru ka sumur Darwan, pikeun ngabuktikeun eta obrolan, bab boneka nu ditojos jarum tea.
Ari pek, sabada dipaluruh, di handapeun batu gede di sumur Darwan, memang enya aya banda nu diobrolkeun ku dua malaikat tadi. Eta boneka, sagancangna dipasrahkeun ka Rasulullah.
Nurutkeun Ibnu Katsir, meh bareng jeung kapanggihna boneka sihir, Allah SWT ngalungsurkeun surat Al Falaq ka Rasul, minangka hiji tanda yen Allah SWT maha agung.
“Saterasna Nabi maos eta surah tur ditiupkeun kana cai. Caina dibalurkeun kana sakujur badan Nabi dugi pulih deui,” cek Ibu Katsir dina Tafsir Ibnu Katsir jeung Imam Bukhari dina Shahih Bukhari.
Baca Juga: Geujleung, Albeum Anyar ti KPop TXT, Sapoe Kajual 1,8 Juta, Rekor ti Grup Kameumeut
Kitu tah soal sihir, teluh atawa santet nu dipercaya masih keneh aya jeung dipake ku sawatara jalma. Walohualam bissawab.***
