Network
GALURA.CO.ID –Ketua Persatuan Pedalangan Indonesia (Pepadi) Ciamis, Deden Kurnia nyebutkeun Binojakrama Pedalangan Wayang Golek Purwa tingkat Kabupaten Ciamis direncanakeun digelar bulan Mei 2024. “Dina waktos paraseniman henteu seueur manggung,” pokna.
Binojakrama dimaksudkeun keur ngayak dalang di Kabupaten Ciamis nu pantes tandang di Binojakrama tingkat Jawa Barat nu bakal dilaksanakeun di Kabupaten Bogor taun 205. Dina Binojakrama di Kabupaten Bandung, 27-28 November 2023, dalang ti Kabupaten Bogor, Den Gala, S.Sn, pinujul kahiji sarta ngaboyong piala Bokor Mas Astagina.
Dina tradisi Binojakrama tingkat Jawa Barat, kabupaten nu dalangna ngaboyog Bokos Mas Astagina dina Binojakrama saterusna jadi pribumi. Kabupaten Bandung jadi pribumi oge lantaran dalangna mampu mawa Bokor Mas Astagina dina Binojakrama samemehna.
Binojakrama digelar dua taun sakali. Pepadi Kabupaten Ciamis dina Binojakrama taun 2025 di Kabupaten Bogor bakal ngirimkeun dalangna. Absenna Kabupaten Ciamis dina Binojakrama kamari matak ngaragragkeun ngaran Tatar Galuh, seniman jeung budayawan di Kabupaten Ciamis.
“Udagan simkuring dalang-dalang ti Kabupaten Ciamis kedah nanjung kedah tiasa satata sareng dalang-dalang ti kabupaten sanesna,” ceuk Deden Kurnia sumangaet pisan. Pikeun ngasah jeung meuseuh dalang di Kabupaten Ciamis, Pepadi Ciamis ti Januari 2024, ngagelar pelatihan jeung pendidikan (Diklat), dilaksanakeun sabulan sakali.
Pepadi Ciamis saenyana karek dibentuk 23 November 2023, di SK-an ku Kepala Dinas Kebudayaan Pemuda dan Olahraga kalayan asma Bupati Ciamis. Dibentuka Pepadi Ciamis ngarespon pedah Kabupaten Ciamis teu bisa ngirimkeun dalangna dina Binojakrama di Kabupaten Bandung.
Maksud pangurus Pepadi Ciamis dibenyuk sarta gancang di SK-an teh tadina mah dina raraga keur ngirimkeun pamilon ka Binojakrama di Kabupaten Bandung. Kaluarna SK pangurus anyar Pepadi Ciamis piopat poeeun deui kana prungna Binojakrama.
Ku lantaran santek teuing Pepadi Ciamis teu sanggupeun ngirimkeun dalang wawakil Kabupaten Ciamis pikeun tandang dina Binojakrama di Kabupaten Bandung. Lian ti eta, anu tandang di Binojakrama tingkat Jawa Barat dalang pinunjul kahiji Binojakrama tingkat kabupaten atawa kota.
Tina kituna, Binojakrama bulan Mei 2024 engke, salian ti wadah para dalang di Kabupaten Ciamis keur nembongkeun kamotekaranana, oge keur milih dalang nu pantes tandang dina Binojakrama tingkat Jawa Barat.
“Direncanakeun dina Binojakrama tingkat Kabupaten Ciamis anu dipeunteun mah dalagna, ari nayaga mah henteu dipeunteun,” ceuk Deden Kurnia. Nayaga kitu deui sinden engkena diayak deui. Dalang pinunjul kahiji engke digembleng deui ngarah bener-bener asak sarta pantes jadi pamilon Binojakrama.
Pangurus Pepadi Ciamis nu di-SK-an ku Kepala Disbudpora Kabupaten Ciamis:
Penasehat :H. Cahyo Yuswana, Deden Tirayana, Edi Kurnadi
Ketua: Tomas Kurnia, S.Pd (Deden Kurnia)
Wakil Ketua: Koko Koswara
Sekretaris: Rian Nugraha
Bendahara: Kuswan
Pendidikan dan Pelatihan: Dede, Atep, Yoga S,Sn
Humas: Nuryanto Tirayana, Maman, Edi Pentil
Sarana Prasarana: Nanang, Nana, Iim Ibrahim
Dokumentasi: Aldo Zulkarnaen, Dani Yuyup, Dika.
Naha Pepadi Ciamis mampu ngaronjatkeun kamotekaran dalang di Kabupaten Ciamis sarta bisa nanjung di tingkat regional, nasional jeung internasional? Urang dagoan wae kumaha ketak jeung program-programna.***
