Network
GALURA.CO.ID -Kabupaten Ciamis teu ngirimkeun dalang keur tandang dina binojakrama Pedalangan Wayang Golek Purwa digelar 27-28 November 2023, di Balerame Komplek Gedong Budaya Sabilulungan (GBS) Soreang, Kabupaten Bandung.
Tina jumlah kabupaten jeung kota di Jawa Barat nu lobana 27, ukur aya 14 kabupaten kota nu miluan Binojakrama Pedalangan Wayang Golek Purwa nu diayakeun ku Persatuan Pedalangan (Pepadi) Jawa Barat teh. Kabupaten Ciamis salasahiji kabupaten nu teu ngirimkeun wakilna.
Pamilon Binojakrama Pedalangan Wayang Golek Purwa nu digelar dua taun sakali tèh: Kabupaten Pangandaran, Kabupaten Bekasi, Kabupaten Karawang, Kabupaten Purwakarta, Kabupaten Subang, Kabupaten Garut, Kabupaten Sumedang, Kabupaten Bogor, Kabupaten Bandung Barat, Kabupaten Bandung, Kabupaten Kuningan, Kota Bandung, jeung Kota Cimahi.
Baca Juga: Binojakrama Pedalangan Wayang Golek Purwa Digelar di GBS Kabupaten Bandung 27-28 November 2023
Di Priangan Timur anu teu ngirimkeun dalang sina tandang dina Binojakrama Pedalangan Wayang Golek Purwa taun 2023, sajaba Kabupaten Ciamis, teh: Kota Banjar, Kota Tasikmalaya jeung Kabupaten Tasikmalaya. Padahal kabehanana kaasup Tatar Sunda nu masih kandel dina budaya Sunda.
Disbudpora Ciamis ngabetem
Kepala Seksi Kesenian Dinas Kebudayaan Pemuda dan Olahraga (Disbudpora) Kabupaten Ciami nu oge pamong budaya, Eman Hermansyah Sastrapraja, S.Pd, tepi ka ieu warta ditayangkeun, teu ngajawab sakecap-kecap acan patalekan nu diasongkeun ku Galura kana WA-na.
Ka Eman, Galura ngirimkeun patalekan:
- Ku naon Kabupaten Ciamis teu ngintunkeun dalang dina binojakrama pedalangan di Kabupaten Bandung?
- Naha tos teu aya dalang di Kabupaten Ciamis?
- Salami ieu naon wae nu dipilampah ku Disbudpora Kabupaten Ciamis dina ngabina dalang di Ciamis?
Kabupaten Ciamis saenyana mah rea dalang. Malah di SMPN 1 Tambaksari siswana dalang cilik. Malah aya dalang nu Kiwari keur kuliah di Kabupaten Kuningan. Dalang-dalang sejenna oge kaasup eksis, mindeng manggung.***
