WARGA Bandung jeung sabudeureunana nu mikaresep kana pagelaran tèater, bisa jadi pagelaran drama réligi Sunda Kasidah Cinta Al Kubra karya/sutradara Rosyid E Abby jadi ubar kasono kana pagelaran tèater nu kungsi reureuh.
Enya, disebut reureuh téh pédah Teater Senapati Bandung nu ti taun 2006 kénéh biasa magelarkeun drama réligi “Kasidah Cinta” saban bulan Ramadan, tilu taun ka dieunakeun mah geus tara magelaran deui. Magelaran pamungkas téh taun 2019, dina épisodial Kasidah Cinta Sang Muazin.
Naha ka mana salila tilu taun téh?
“Aya. Tapi ku margi aya sasalad Covid-19, nya teu tiasa magelaran di tempat umum. Paling ngadamel karya-karya kanggo tayangkeuneun virtual. Dina taun 2020, sasih Maret, pas Senapati badé latihan pisan kanggo garapan ‘Kasidah Cinta’, éh… kabujeng aya wawaran ti pamaréntah tong waka aya kagiatan nu sipatna ngabaud jalma réa di tempat umum. Tétéla geuning éta téh manjang dugi ka 2022. Tah, salami 2020, 2021, sareng 2022, Teater Senapati teu magelarkeun ’Kasidah Cinta’,” ceuk Rosyid E Abby, Pembina/Sutradara Teater Senapati, anu oge Pamingpin Redaksi SKM Galura jeung Penanggung Jawab Galura Online.
Tapi Jumaah – Saptu, 7 – 8 April 2023 ka tukang, Teater Senapati témbong deui kétakna, aya deui karyana. Magelaran di tempat nu sarua jeung taun-taun méméhna, di Gedong Kasenian Rumentang Siang, Jalan Baranangsiang (Kosambi), Bandung, Teater Senapati magelarkeun deui drama religi Sunda Kasidah Cinta Al-Kubra.
Utamana pikeun Rosyid E Abby mah, suksés pintonan Kasidah Cinta Al-Kubra téh satutas suksés pagelaran drama Panggil Aku Uwi, dina milangkala ka-67 Persatuan Artis Film Indonesia (Parfi) nu diayakeun 10 Maret 2023 di Pusat Perfilman Haji Usmar Ismail (PPHUI) Jakarta. Enya, kapan Panggil Aku Uwi anu disutradaraan ku Irwan Guntari téh, anu nyaritakeun kahirupan jeung perjuangan Raden Dewi Sartika dina ngadegkeun Sakola Kaoetamaan Istri, naskahna karya Rosyid E Abby. Ari nu jadi Dewi Sartika-na, taya lian artis Paramitha Rusady.