GALURA -Dunya militer ngalantarankeun Tubagus (Tb) Hasanuddin ka Istana Kapresidenan. Ti ajudan nepi jadi sekretaris militer presiden. Pangsiun, ieu jenderal bintang dua ancrub kana pulitik.
Tb Hasanuddin nu lahir 8 September 1952 teh Akabri taun 1974. Sataun ti harita ditugaskeun di Batalyon Kodam Siliwangi nepi 1983.
Tb Hasanuddin satuluyna dipercaya jadi Instruktur Akabri Magelang salila 2 taun, tuluy ditugaskeun di Kodam I Aceh nepi ka taun 1989.
Baca Juga: Jawa Barat teh Geuninganan Provinsi Waduk
Karierna kawilang norolong, Tb Hasanuddin satuluyna jadi dosen di Seskoad Bandung.
Kungsi jadi Komandan Sektor Pasukan Perdamaian PBB di Irak taun 1992 salila sataun. Ti dinya ditugaskeun deui pikeun dines di Kostrad jeung Kodam Jaya.
Karierna leuwih deukeut kana kakuasaan nalika jadi ajudan Wakil Presiden Try Sutrisno jeung ajudan Presiden B.J. Habibie.
Taun 2001, dijungjung lungguh jadi Sekretaris Militer Presiden Megawati Soekarno Putri jeung Susilo Bambang Yudhoyono.
Satuluyna Tb Hasanuddin nyangking kalungguhan Staf Mabes TNI AD nepi ka 2009.
Baca Juga: Jaman Ciamis-Cirebon keur Werit, Ngakalan Begal Disingsieunan ku Bangkong Pabeasan
Pangsiun pangkat mayor jenderal, Tb Hasanuddin ngagabung jeung PDI Perjuangan, partey pingpinan Megawati Soekarnoputri.
Di Pemilu 2009, jadi anggota DPR RI ti PDI Perjuangan. Di DPR RI dipercaya jadi wakil ketua Komisi I. Dina Pemilu 2014 kapilih deui jadi anggota dewan.
Di PDI Perjuangan inyana nyangking kalungguhan Ketua Departemen Politik DPP PDI Perjuangan. Taun 2012 TB Hasanuddin dipercaya jadi Ketua DPD PDI-P Jawa Barat.
Dina Pilgub 2018, PDI Perjuangan nyalonkeun Tb Hasanuddin jadi gubernur Jawa Barat 2018-2023 kalayan wakilna Inspektur Jenderal Anton Charliyan, mantan Kapolda Jabar.
Baca Juga: Ketua DPRD Kabupaten Bandung: KPU Kabupaten Bandung Ngalelece Lembaga DPRD
Dina widang kabudayaan jeung seni, Tb Hasanuddin jadi Ketua Dewan Penasehat Pencak Silat Gagak Lumayung.
“Seni jeung budaya teh karya anak bangsa anu teu bisa dipisahkan,” ceuk Tb Hasanuddin sawaktu jadi keynote speaker dina sarasehan “Budaya untuk Membela Negara” anu dilaksanakeun di RRI Bandung, sababaraha waktu katukang.
Inyana ti SD tepi ka SMA tepi ka danget ieu aub pakepuk dina widang seni jeung budaya. Luluhurna oge sarua ancrub kana seni budaya.
Tb Hasanuddin oge diajar jeung neuleuman penca. Kungsi nyangking juara katilu dina kajuaraan penca tingkat nasional.
“Simkuring waktos di AKABRI sareng waktos nyuprih elmu di Prancis, ngajarkeun silat,” pokna.*** Ayank R Sambara