Sajak Emha Ubaidillah

Sajak Emha Ubaidillah

Hanjuang di Gunung Padang
(Sinom)

Hanjuang di Gunung Padang
Na geger pasir nyengceling
Bangun anu ngagupayan
Geusan nyaba ka bihari
Geusan ngaragap diri
Ka tebihna ka lawung dumuk
Ka jaman nu mana boa
Sumampeur tigin maripi
Ngabulungbung balungbang luang baheula.

Hanjuang di Gunung Padang
Jentulan pangĕling-ngĕling
Beureum hibar narawangan
Puluh abad ratus warsih
Kaludangna kiwari
Supagi getĕn maluruh
Janten luang kasadaran
Ngararab ĕlmuning Gusti
Geusan nangtung nangtang ngeunteung ka wiwitan.

Hanjuang di Gunung Padang
Burahay pucukna lilir
Iceus nataan juringkang
Nu ngaleut ti tepis wiring
Ngadu manis hariring
Parentul lacak karuhun
Muragabaya samakta
Guritan Bujangga Manik
Lana lasteu lastari lunta lampahna.

(Mumunggang Gunung Padang, Ujung April 2015)

Kinanti Bandung Cianjur