Network
Mitembey ti puseur Bandung
Haneut moyan nurih wanci
Meulah puhu beurang reup bray
Nyisit tiris lamping pasir
Nyemprung niruk gugunungan
Gegerna bandung bihari.
Nembus ray-rayan halimun
Dibagĕa langit praspris
Na pecat sawed malebah
Malibir sasak lungkawing
Jambatan Rajamandala
Nyeblak ku baluas teuing.
Ka tetelarna padumuk
Anjog ka wewengkon asri
Nĕtĕ akar ngembing jangkar
Gunung Padang imut nyari
Ngadago nu ngaronghĕap
Rampohpoy ngorĕjat deui.
Rawayan Bandung-Cianjur
Saringkang ku nu ngagurit
Bruh-brĕh alam mangsa lawas
Di tetengger batu mĕnhir
Diundakan tatapakan
Diayun ambing hiliwir.
(Pakidulan Cianjur, 2015)
