Network
GALURA.CO.ID -Satutas Pengurus SLCC (Smart Learning Center and Character) jeung Perempuan PGRI diistrènanan dina Konferensi Kerja III PGRI Kabupaten Bandung, tanggal 28 Oktober 2023, SLCC jeung Perempuan PGRI langsung ngabrèt.
"Alhamdulillah simkuring saparakanca tos diistrènan. Langsung gaspol, nu sanès konferensi, simkuring saparakanca langsung rapat koordinasi, audiensi sareng Pa Kadisdik, " ceuk Ketua SLCC H. Riyan Rosal YO, M.Pd, Senen (30/10/2023).
Riyan nyebutkeun, timna aya sabelas urang, rèk ngajalankeun program deukeutna, lauching webinar di Hari Guru. "Dina webinar engkè bakal aya preview perkawis SLCC. Materi nu dibahas salasahijina perkawis pembentukan karakter, " pokna.
Baca Juga: Konker III PGRI Kabupaten Bandung Dr. H. Agus Firman: Zaini: PGRI Kudu Sumanget Ngamajukeun Atikan
Iwal ti kitu, SLCC ogè ceuk Riyan bakal nguriling ka sababaraha cabang ngawanohkeun SLCC, jeung ngayakeun saniskara lomba.
Riyan nerangkeun, SLCC atawa Smart Learning and Character Center tèh perangkat kalengkepan PGRI nu tugasna ngembangkeun profesi guru jeung atikan karakter.
Ceuk Riyan, SLCC minangka anak badan ti organisasi PGRI, tujuan diadegkeunana pikeun ngaronjatkeun standart kualitas guru sacara kaprofesian.
Di jaman teknologi jeung informasi, SLCC PGRI teh, ceuk Riyan, lembaga pangembangan kompetensi guru, tempat keur, ngalatih, ngasakeun atawa ngadiklat para guru.
Patali pembelajaran jeung pembentukan karakter ku cara make teknologi informasi, ceuk Riyan, SLCC PGRI ogè museur kana seminar, talk show katut diklat pembelajaran ngagunakeun teknologi digital jeung pendidikan karakter.
