Network
GALURA - Lomba Pramuka Tingkat 3 Kabupaten Bandung Barat digelar enggoning ngawujudkeun insan nu pancasilais.
Diiluan ku peserta regu ti 16 Kwaran ti kacamatan di Kabupaten Bandung Barat, eta Lomba Pramuka Tingkat 3 teh ngagelar rupaning materi lomba nu gede patalina keur ngabentuk siswa pancasilais.
Peserta atawa regu dina Lomba Pramuka Tingkat 3 Kabupaten Bandung Barat nu diudaganana keur nyiptakeun karakter pancasilais diwengku ku siswa SD/MI katut SMP/MTs.
Lomba Pramuka Tingkat 3 Kabupaten Bandung Barat lumangsung 24-26 Februari 2023 di Bumi Perkemahan Bhakti Husada Kacamatan Cisarua.
Guru pembina MTs Cisasawi, Asep Taufik, mertelakeun, dina eta lomba, unggal Kwaran diwakilan 4 regu.
Ti Kwaran Pramuka Parongpong, nu jadi pendamping teh antarana A Tarmedi, Kiki Ahmad, sarta Ira Andriani.
MTs Cisasawi, salasahiji wawakil Kwaran Pramuka Parongpong, ngabenkeun saregu Pramuka: Anggrek Biru, diwengku ku 8 siswi MTs Cisasawi ti kelas 7 jeung 8.
Baca Juga: Market Day Sekolah Alam Quran Nur Madani, Numuwuhkeun Jiwa Wirausaha Siswa Dibarung Kajujuran
"Materi nu dilombakeun teh kaligrafi, kultum, Pengetahuan Agama Islam, manajemen regu, lagu-lagu wajib, pengetahuan umum, sarta pengetahuan Pramuka," pokna, Saptu, 25 Februari 2023.
Lian ti eta, dina Lomba Pramuka Tingkat 3 Kabupaten Bandung Barat oge diabenkeun lomba karnaval, pentas seni, perkara obat tradisional, PPGD, KIM, halang rintang.
Anu sejenna: lomba katapis manah, senam, isarat jeung semboyan, sandi, panorama, navigasi, peta pita, baris, ngadegkeun tenda, hasta karya, masak, jeung sajabana.
Nu ngujina teh ti rengrengan Kwartir Cabang Pramuka Kabupaten Bandung Barat nu dipupuhuan ku H Aseng Junaedi.
Ceuk Asep Taufik, Lomba Pramuka Tingkat 3 Kabupaten Bandung Barat boga maksud salasahijina teh ihtiar ngagumelarkeun generasi pancasilais nu parigel tur mibanda jiwa mandiri.
"Kajaba ti eta, keur ngawujudkeun generasi unggul nu miboga jatidiri luyu jeung udagan Tri Satya katut Dasa Dharma Pramuka," pokna. ***
