Network
GALURA.CO.ID -Bupati Bandung, Dadang Supriatna, ngajèntrèkeun kasang tukang ASN 360 urang nu dilantik 22 Maret 2024 tapi dibatalkeun 18 April 2024.
"Tanggal 28 Maret 2024 nganggo Asosiasi Pemerintah Kabupaten Seluruh Indonesia (APKASI) simkuring ngadugikeun langsung ka Pa Menteri Dalam Negeri, neda pituduh perkawis UU Nomor 10 Tahun 2016," ceuk Dadang Supriatna di Soreang, Saptu, 20 April 2024.
Dadang nyebutkeun klosul 2 pasal 71 UU Nomor 10 Tahun 2016, nu unina:
"Gubernur atau Wakil Gubernur, Bupati atau Wakil Bupati, dan Wali Kota atau Wakil Wali Kota dilarang melakukan pergantian pejabat 6 (enam) bulan sebum tanggal penetapan pasangan calon sampai dengan akhir masa jabatan kecuali mendapat persetujuan tertulis dari Menteri."
Baca Juga: Milangkala ka-383 Kabupaten Bandung Tingkat Kecamatan Margahayu, Warga Disuguhan Dewi Nurcahya
Nu ditanyakeun Dadang Supriatna ka Mendagri lebah dieu naha patokanana Surat Edaran (SE) taun 2021 atawa aya parobahan. Dadang menyebutkan, Menteri harita nèmbal aya parobahan.
"Pa Mentri nyuhunkeun data ASN nu dilantik tèa. Nya kaping 29 kaluar SE, kanggo Kepala Daerah nu badè Pilkada dipahing ngayakeun palantikan 6 sasih sateuacan Pilkada, kajaba aya idin ti Menteri, " ceuk Dadang Supriatna.
Bupati Bandung nyebutkeun, dina SE tèh ditetepkeun mimiti tanggal 22 Maret 2024 dipahing aya palantikan, ari 360 ASN di lingkungan Pemda Bandung geus dilantik pas tanggal harita.
Dadang Supriatna ngaku harita kènèh ogè ngusulkeun idin ka Menteri liwat Gubernur. Tanggal 4 April 2024 meunang rekomendasi ti Gubernur Jawa Barat nu 360 ASN tèh ditepikeun ka Kemendagri.
