Network
GALURA -Stasion kareta api di Buitenzorg (ayeuna Kota Bogor), ngadeg taun 1872. Nu ngawangunna pausahaan kareta api Walanda, minangka stasion nu pamungkas keur jalur Batavia-Buitenzorg.
Dioperasikeunana jalur Batavia-Buitenzorg mimiti taun 1873, bareng jeung rengsena wangunan stasion.
Pamarentah Hindia Walanda ngabangun jalur kareta Batavia- Buitenzorg keur nyumponan pangabutuh masarakat kana perluna angkutan transportasi nu leuwih gancang jeung leuwih merenah.
Baca Juga: Palabuan Sunda Kalapa, Kecap Kalapa asalna tina Karapa, Ngaran Wewengkon di Suku Maya
Memeh dibuka jalur kareta api Batavia- Buitenzorg transportasi make kuda nu tangtu teu sagancang kareta api. Beda jeung ngagunakeun kareta api, ti Batavia ka Buitenzorg merelukeun dua jam.
Lian ti keur nyumponan transpotasi, jalur kareta api Batavia - Buitenzorg tujuan nu sabenerna mah keur kapentingan angkutan hasil bumi.
Hasil bumi ti pagunungan dikumpulkeun di palabuhan Tanjung Priok nu satuluyna diangkut ku kapal cai ka Nagri Walanda jeung nagara Eropa sejenna.
Wangunan stasion Bogor, di dua tingkat; saban dindingna euyeub ku ornamen arsitektur corak Eropa nu direumbeuy ku sawatara motif, upamana motif geometrik awan, motif suku singa jeung motif lorong jalan.
Corak arsitektur wangunan stasion Bogor, katangen masih asli. Nya kitu deui kusen panto jeung jandela, masih utuh mintonkeun arsitektur corak nu heubeul.
Kabeh stasion kareta api nu diwangun ku Walanda, arsitekturna corak Eropa, saperti Stasion Tugu Yogyakarta, Stasion Tanjung Priok jeung Stasion Jakarta Kota, bangunanna teu leupas tina arsitektur ornamen Eropa.
Kantor stasion nu laleutik di wewengkon Semarang jeung Solo, saperti Stasion Kedung Jati, Salem, Gundih, Sumberlawang, arsitektur wangunanna nembongkeun nilai seni nu kawilang endah.
Payus pisan sawatara stasion kareta nu bieu ditataan teh dijadikeun obyek wisata nu tangtu bakal mincut wisatawan mancanagara.
Baca Juga: Agama Sunda, Ceuk Pantun Bogor, Geus Aya Jauh Samemeh Urang India Daratang ka Nusantara
Kiwari, kaendahan sabudeureun stasion Bogor teh geus meh leungit. Wangunan stasion teh ayeuna mah dikubeng ku dug-bdegna pangwangunan puseur balanja.
Padahal tadina di hareupeun kantor stasion Bogor aya lapang nu ngahiji jeung buruan. Lapang nu dingaranan Wilhemina Park teh, baheula kajojo tempat ngadaweungna para gegeden Belanda.
Stasiun Bogor geus dijadikeun Cagar Budaya dumasar SK Menbudpar No: PM. 26/PW.007/MKP/2007, tanggal 26 Maret 2007.***
