GALURA - Poe pere biasana identik jeung wisata, pelesir atawa piknik.
Tah patali jeung wisata, aya tilu tempat nu direkomendasikeun pikeun disungsi di Kabupaten Cianjur, Jawa Barat.
Tapi, eta oge tangtu mun aya rencana wisata, pelesir, piknik ka wewengkon Cianjur.
Nurutkeun pangalaman Galura, tilu tempat wisata nu direkomendasikeun teh endah jeung instagramable pisan.
Naon wae?
Hiji, basisir Jayanti.
Basisir Jayanti teh hiji tempat wisata alam nu pamandanganana endah kacida. Sajaba ti eta, instagramable pisan.
Di basisir Jayanti, sajaba ti bisa ningali endahna laut ka jauhna, oge bisa nitenan kahirupan pamayang jeung kapal-kapalna nu rek miang atawa mulang balayar neangan lauk.
Lian ti eta, wisatawan ge bisa ulin di basisir, ngojay, atawa ngan saukur ulin keusik, atawa nambul beuleum lauk laut meunang mesen ti warung seafood di lelewek basisir.
Baca Juga: Rekomendasi 2 Tempat Wisata di Bogor, Ngopi di Sawah, Kukudaan di Gunung Mas, Healing keur Kulawarga
Dua, Cirata Jangari
Tempat wisata nu disebut Cirata Jangari teh sesebutan keur Waduk Cirata, dano jieunan nu caina keur bubutuh PLTA.
Kaayaan di Cirata Jangari endah kacida alamna. Di dieu, urang bisa angkleung-angkleungan di luhureun cai ngagunakeun parahu leutik. Keur nu resep nguseup mah, ngangkleung dina beungeut cai teh bisa bari nguseup sagala.
Tempatna lain bobohongan, instagramable, merenah disungsi jeung kulawarga atawa kabogoh.
Tilu, Curug Cikondang
Ieu tempat wisata perenahna di Wangunjaya, Campaka, Cianjur, Jawa Barat.
Sakumaha tempat wisata mangrupa curug sejenna, nu dijual di ieu tempat oge sarua, cai nu nyurug nu caina canembrang herang jeung beresih kacida.
Lian eta ti eta, tangtu hawa nu seger jeung pamandangan alam nu endah.
Keur nu resep popotoan, di ieu curug Cikondang ge rea spot keur popotoan nu instagramable. ***