Network
GALURA.CO.ID –Bupati ceuk Wakil Bupati Ciamis periode 2019 -2024 hasil Pelkada Serentak taun 2019, Herdiat Sunarya jeung Yana D. Putra ti 31 Desember 2023 maren tugasna. Ti mimiti 3 Januari 2024 duanana moal ngantor deui di Kantor Bupati Ciamis.
Memehna Herdiat Sunarya jeung Yana D Putra diiberkeun bakal ngajabat tepi ka April 2024, lantaran dilantik jadi Bupati jeung Wakil Bupati dina bulan April 2019, sababaraha bulan sabada KPU netepkeun duanana jadi bupati jeung Wakil Bupati pinilih.
Herdiat Sunarya jeung Yana D Putra jadi Bupati jeung Wakil Bupati Ciamis hasil Pillkada Serentak 27 Juni 2018. Mendagri ngaluarkeun SK pangangkatan 5 September 2018. Ari kuduna mah langsung diistrenan ngan duka kumaha diistrenana 20 April 2019, kurang leuwih dalapan bulan sangggeus kaluarna SK ti Mendagri.
Baca Juga: Bupati jeung Wabup Ciamis Periode 2019-2024 Purnabakti 31 Desember 2023
Luyu jeung palaturan kuduna mah Herdiat Sunarya jeung Yana D Putra ngecagkeun kalungguhanana 5 September 2023, luyu jeung SK ti Mendagri. Ngan beda jeung daerah sejen nu kepala daerahna dipilih dina Pilkada seretak 2018, Herdiat jeung Yana marenna tepi ka Desemmber 2023.
DPRD Kabupaten Ciamis ngabewarakeun Herdiat jeung Yana maren tugas 31 Desember 2023 dina sidang paripurna nu digelar 5 Desember 2023. DPRD Kabupaten Ciamis saterusna ngajukeun surat dieureunkeunana Herdiat jeung Yana ka gubenur Jawa Barat nu saterus ditepikeun ka Kemendagri pikeun ditetepkeun ku Mendagri.
Lian ti eta DPRD Ciamis oge ngajukeun usulan penjabat (pj) bupati Ciamis. Ieu usulan teu otomatis disaluyuan ku gubernur Jabar jeung ku Mendagri, sabab boh gubernur boh Mendagri bisa nangtukeun pj bupati. Ngan anu jelas mah pj bupati Ciamis ti kalangan birokrat.
Masarakat Kabupaten Ciamis miharep pj bupati neruskeun visi jeung misi nu digariskeun dina Rencana Pembangunan Jangka Menengan Daerah (RPJMD). Pj bupati Ciamis kudu neruskeun hanca garapan bupati jeung wakil bupati samemehna.
Lian ti eta anu leuwih penting deui pj bupati Ciamis kudu mampu ngajaga netralitas ASN di Kabupaten Ciamis dina Pemilu serentak jeung Pilpres nu digelar 14 Februari 2024. Pj bupati Ciamis bakal dipocongok lain ukur ku DPRD tapi oge ku sakumna masarakat.
