Network
GALURA.CO.ID. - Menteri Pemuda dan Olahraga Republik Indonesia (Menpora RI) Dito Ariotedjo jeung Menteri Pertahanan Republik Indonesia (Menhan RI) Prabowo Subianto ngaresmikan puncak acara miéling Hari Olahraga Nasional (Haornas) 2023. Peresmianana ku cara duanana nepak bal voli, cirining resmi dibukana kagiatan.
Puncak acara miéling Haornas 2023 téh lumangsung di Jakarta International Velodrome, Jakarta, Saptu. 9 September 2023. Menhan Prabowo harita ngawakilan Presiden Joko Widodo anu teu iasa hadir alatan aya pancén kanagaraan.
Dina pangbagéana, Prabowo nyebutkeun yén olahraga téh raket pisan patalina jeung pertahanan. Numutkeun Prabowo, dina awak nu séhat aya jiwa anu séhat ogé. Kitu deui sabalikna, cenah.
“Lamun pamuda hiji bangsa kuat fisik katut jiwana, mangka éta bangsa gaduh sumanget pikeun jadi pemenang tur raharja (makmur). Teu aya bangsa anu berhasil tanpa bangsa anu tanggoh. Ku kituna, sadaya stakeholder gaduh peran anu kalintang penting. Pertahanan hiji nagara katingal tina prestasi pamudana,” ceuk Prabowo.
Ieu menhan anu ogé Ketua Umum Pengurus Besar Ikatan Pencak Silat Seluruh Indonesia (PB IPSI) téh miharep, miéling Haornas taun ieu jadi momentum pikeun terus ngaronjatkeun olahraga nasional. “Bangsa pemenang nyaéta bangsa anu henteu babari sumerah. Bangsa anu terus latihan pikeun nyangking atawa ngahontal keberhasilan,” pokna.
Ekosistem olahraga
Sajeroning kitu, Menpora Dito nepikeun pangwanti ti Presiden Joko Widodo ngeunaaan ekosistem besar olahraga anu kudu dimekarkeun tur dikuatan. Numutkeun Menpora, Presiden maparin arahan sangkan sport science perlu dijieun di paguron luhur, utamana ku sawatara program studi kayaning manajemen olahraga, kesehatan olahraga, arsitektur fasilitas olahraga, industri kreatif olahraga, anu kudu dimekarkeun sagancangna.
“Ku kituna, ekosistem pendidikan tiasa kontribusi ka dunya olahraga pikeun ngahasilkeun atlet olahraga, wirausahawan olahraga, pakar olahraga, manajer klub olahraga, dugi ka para tanaga profesional sanésna,” ceuk Dito Ariotedjo.
