Network
GALURA- Stadion Si Jalak Harupat di Kecamatan Kutawaringin Kabupaten Bandung Jawa Barat ngabebenahna rek dikebut sanggeus resmi kapilih jadi salasahiji tempat pertandingan Piala Dunia U 17 tina 8 stadion nu diusulkeun.
Kitu ditepikeun Bupati Bandung, Dadang Supriatna satutas rapat koordinasi jeung Menteri PUPR, Menpora, katut Menteri BUMN di rohang rapat Menteri PUPR Jakarta Selatan, Rebu (09/08/2023) nu di antarana ngabahas Stadion Si Jalak Harupat nu dipake Piala Dunia U 17.
Bupati Bandung nyebutkeun Piala Dunia U17 baris dilaksanakeun ahir November 2023. Jadi masih aya kènèh waktu 93 poè keur ngabebenah Stadion Si Jalak Harupat.
Baca Juga: Bupati Bandung: Atikan di Pasantren Bisa Nyitak Pamingpin nu Mibanda Ahlakulkarimah
Ceuk Dadang Supriatna, masih kènèh aya dua hal nu perlu ditingkatkeun di Stadion Si Jalak Harupat: nempatkeun perimeter jeung ditambahanan lapangan latihan.
“Ditempatkeunana perimeter naha badè disimpen di lebet atanapi di luar, engke gumantung kaptusan FIFA. Upami di luar mangka aya rèsiko akses ring root. Tapi mun dijero bawirasa cekap,” pokna.
Iwal ti kitu tina hasil rapat lapangan ITB jeung Arcamanik baris janten lapangan tambahan. “Jadi engkè total aya 6 lapangan latihan di Bandung Raya tapi kanggo pelaksanaan pertandingan tetep di Stadion Si Jalak Harupat,” ceuk Dadang Supriatna. mungkas.*** Sopandi
