GALURA - Ngareuah-reuah mieling Hari Lahir 1 Abad Nahdlatul Ulama (Harlah 1 Abad NU) tingkat Kabupaten Majalengka lumangsung gumebyar. Kagiatan nu dipuseurkeun di Alun-alun Talaga teh mintonkeun Haddad Alwi diluuhan ku keluarga besar KBNU Majalengka sarta sakumna tamu sejenna (11/03/2023).
Haddad Alwi lir nu ngahipnotis sakumna warga NU Majalengka nu ngaluuhan Harlah 1 Abad NU. Warga NU Majalengka langsung ngagimbung di sabeudeureun panggung sarta milua ngahaleuangkeun lirik lagu solawat jeung Cinta Rasul.
Lantuan Solawat Ya Rabbi Bil Musthofa, Sholi Wasalimda Daimanda jeung Cinta Rasul nu dihaleuangkeun ku Haddad Alwi nyirep sakumna nu hadir. Salian pintonan gema solawat dina Harlah 1 Abad NU oge dieusi ku kirab merah putih (beureum bodas), panggung rayat, tawasul jeung Majalengka Bermunajat
Baca Juga: Kado Saabad NU: Tokoh Majalengka Ngarojong KH Abdul Halim Leuwimunding Jadi Pahlawan Nasional
Rawuh dina eta acara Bupati Majalengka H Karna Sobahi, Rais Syuriyah PBNU KH Musthofa Aqil Siroj, Ketua PWNU Jawa Barat, KH Juhadi Muhamad jeung sajabana.
Rais Syuriyah Pengurus Besar Nahdlatul Ulama (PBNU) KH Musthofa Aqil Siroj dina tausyiahna netelakeun, bangsa jeung nagara bisa nanjeur nepi ka kiwari, salasahijina alatan NU nu ngajaga ngariksa tur ngamumule NKRI.
"NU nyandak strategi hijrah. Alhamdulillah, NU nepi ka detik ieu eksistensina masih tetep dirasakeun manpaatna ku sakumna umat," ceuk ieu pengasuh Pondok Pesantren Kempek Cirebon idina tausyiah kagiatan Harlah Saabad NU Majalengka.
KH Musthofa mungkas ceramahna cumeluk ka sakumna warga Nahdliyin, sangkan migawe kahadean ka sing saha wae oge.
Baca Juga: Bakti sosial Sat Samapta Polres Majalengka di Desa Sukamulya nu Katarajang Angin Lilimbungan
Ketua Pengurus Wilayah Nahdlatul Ulama (PWNU) Provinsi Jawa Barat KH Juhadi Muhamad nambahkeun, asup di Abad ka-2 NU, aya sababaraha lengkah sangkan NU leuwih maju sarta angger gede mangpaatna keur umat.
Aya tilu lengkah nu kudu dilaksanakeun tehe: migawe parobahan dina sagala hal, boh ku warga NU sacara individu boh sacara kalembagaan.
Kadua, Struktur Kaelmuaan. Penting pikeun warga NU pikeun tuluy ngaronjatkeun kapasitas Sumber Daya Manusia (SDM) dina sagala widang kahirupan sangkan NU bisa tuluy gede kontribusina keur bangsa katut nagara.
"Pamungkas, nu katilu, warga NU kedah mibanda lembaga boh formal oge non formal. Ieu sarana kangge syiar NU supaya langkung nerekab," ceuk ieu ketua manten PCNU Kabupaten Indramayu teh.
Baca Juga: Kapolres Majalengka Dileler Pangajen, LPAI Ngarojong Polres Ngungkab Kasus Kajahatan ka Barudak
Ketua Pengurus Cabang Nahdlatul Ulama (PCNU) Kabupaten Majalengka KH Dedi Mulyadi nyebutkeun, mieling Milangkala Saabad NU Kabupaten Majalengka di Kecamatan Talaga dina raraga sulaturahmi masarakat Majalengka di wilayah kidul.
Ceuk ieu pengasuh Pondok Pesantren Darul Atqiya Maja, NU kiwari bakal ngajaga tur ngariksa NKRI. “NU tetep jadi benteng NKRI," pokna.
Bupati Majalengka netelakeun NU Majalengka dipiharep leuwih tumuwuh leuwih pengkuh, jadi tauladan dina kaislaman, toleransi, ngajaga persatuan, sarta mibapa ka jaman.
"Simkuring Pemkab Majalengka kawilang ngahaturnuhunkeun ka NU nu parantos sinergi sareng pamarentahan daerah dina ngalaksanakeun tugas tur kawajibanana,” ceuk Bupati Majalengka.*** Ayank R Sambara